Tempotimor (Covalima)-Tuir Diretór Ospitál Referál Suai (ORS) Covalima, José Ferreira Moniz katak, husi janeiru to’o fevereiro 2022 ne’e, ORS rerjista bebe moris hamutuk 119.
“Husi fulan janeiru to’o fevereiru ne’e ami rejistu inan-isin-rua ne’ebé mai konsulta atu partus ne’e 119 no inan-isin-rua ne’ebé partus iha ORS Covalima laiha bebe ida mak mate no maioria bebe moris ho kondisaun normal,” hateten Diretór ORS, José ba jornalista sira iha servisu fatin, Kuarta (23/03).
Diretór ne’e afirma, inan-isin-rua ne’ebé nesesáriu par halo operasaun ne’e hamutuk na’in ruanulu-resin-rua.
“Inan-isin-rua ne’ebé atu mai partus ne’e hamutuk 22 mak nesesária ka halo operasaun no ba bebe ne’ebé moris hamutuk 119, bebe sira hotu kondisaun saudável,” nia tenik.
Alende ORS rejista bebe moris, moras ISPA no dibetes mós númeru kontinua aas iha munisípiu Covalima.
“Fulan rua tinan ne’e, ami rejista moras ba konsulta jerál ba ema boot nia frekuérnsia sa’e mak moras Inspirasaun Respiratóriu Águra (ISPA) hamutuk 222 no tuir fali mak ami rejistu ba ema adultu gastriktis ka stomuk no diabetes ka ran midar aleinde ida ne’e mós tensaun a’as, ne’ebé hamutuk 29 durante fulan rua nia laran,” Nia informa.
Moras ISPA no Diabetes ne’ebé kontinua ataka ba labarik ki’ik sira iha Ospitál Referál Suai Covalima ne’ebé kuaze atus haat resin.
“Kona-ba labarik ki’ik ne’ebé mai konsulta iha sala externa nafatin moras diabetes ho ispa, ne’ebé hamutuk 466, ba labarik ne’ebé afeta ho moras denge hamutuk 74, nain neen mak ami labele salva tanba mai ho grave, seluk husi ne’e di’ak hotu no moras ida tan mak brontunitis ami fo baixa ba labarik hamutuk 34,” Diretór ne’e subliña.
Entertantu diretór ne’e dehan, sei esforsu no foka liu ba moras denge nian, tanba to’o agora moras denge seidauk lakon no kontinua ataka ba labarik ho tinan ki’ik. Tanba ne’e husu komunidade sira oinsa atu prevene moras refere no tenke tau atensaun ba labarik sira, tanba moras ne’e mai husi susuk. Depois tenke halo limpeza iha areadores uma nian nomós bainhira toba tenke uza moskiteiru.(*)
