Tempotimor (Covalima)-Kinta-feira (24/03/2022) ne’e eskipa Sekretáriu Estadu Formasaun Profesionál no Empregu (SEFOPE) desimina informasaun ba estudante Eskola Sekundária Téknika Vokasionál (ESTV) Cristal Covalima, hodi hatene sira-nia vizaun ba oin.
Tuir Diretór SEFOPE Munisípiu Covalima, Agapito Axis Gomes katak, fahe informasaun ba estudante terseiru anu sira, hodi bele kompriende sira-nia vizaun no misaun hodi asesu informasaun.
“Ohin ami halo desimina informasaun ba estudante terseiru anu iha Eskola Téknika Vokasionál Cristal Suai, para sira bele kompriende sira-nia visaun ba futuru oinsa sira bele asesu informasaun ne’ebé SEFOPE akredita liuhusi formasaun sira iha área agricultura, hospitalidade, Konstrusaun sivíl, Otomotif, Pedreiru no hortikultura, depois sira mós sei hetan esperiénsia no bele implementa,” Diretór SEFOPE Munisípiu Covalima, Agapito dehan ba jornalista sira iha ESTV Suai, Kinta (24/03).
Ba oin eskola públiku no katólika sira atu involve hotu, tanba ne’e importante ba estudante finalista sira bele hatene saída mak abanbairua atu halo.
Iha sorin seluk Diretór Edukasaun Munisípiu Covalima, Rui Amaral Seri Seran enkoraza estudante finalista sira tenke tuir formasaun refere ho máximu hodi prepera no rai hanesan bukae ba futuru.
“Tenke partisipa ho didi’ak, tanba futuru iha imi-nia liman, se la prepara oinsa bele kompete iha futuru,” katak Diretór ne’e.
Alende ne’e, reprezentante estudante terseiru anu ESTV Cristal Suai, Mariana Siqueira kontente ho sosializa husi SEFOPE tanba bele lori buat foun ba estudante sira.
“Ami estudante kontente ho SEFOPE nia prezensa mai ami-nia eskola, hodi fahe informasaun ba ami, tanba liuhusi informasaun hirak ne’e ami aprende liután saida mak sira fahe fó ami no ami bele implementa iha ami-nia eskola, eh bainhira akaba iha nível sekundária ami bele utiliza oportunidade sira ne’e,” nia hakotu.(*)
