Tempotimor (Covalima)-Country Manajer Kompañia Internasionál Timor Resources, Filomino Andrade katak, atividade perfurasaun mina iha aldeia Samfuk, suku Camanasa, postu administrativu Suai, munísipiu Covalima sei paradu, tamba sei halo estudu jeolójiku.
“Atividades Timor resource ninian oras ne’e sei para, ho razaun halo estudu di’ak liután no halo balansu, tanba estudu perfurasaun no peskiza ba jeolójika, perfurasaun konsege to’o ona metru 1.600 no bazeia ba alvu 1.440 de’it, maibé ami halo perfurasaun liu, tanba nia indikasaun di’ak,” Country Manager ne’e dehan ba jornalista sira iha edifísiu PNTL Covalima, Domingu (27/03).
Hakat ba perfurasaun foun bele hetan susesu, tanba parte mákina mós sei halo hela manutensaun.
“Perfurasaun husi mina matan Liurai bele hato’o katak, susesu no prespetiva di’ak, ne’ebé sei hala’o ba oin, oinsa bele hatudu rezultadu di’ak iha oin mai,” Nia hatete.
Enkuantu relasiona ho perfurasaun Mina matan Feto Kamaus ne’ebé hahú iha loron 27 Outobru 2021 to’o agora Kompañia Internasionál Timor Resources seidauk iha rezultadu.
“Mina matan feto Kmaus nia rezultadu, ne’ebé ba halo teste ne’e ami sei hein hela, ami bele dehan rezultadu mina matan Feto Kmaus nian ladun pozitivu, tanba ne’e estudu kle’an liután hodi bele haree desizaun kompañia oinsa bele ba oin,” Nia hakotu.(*)
