Tempotimor (Covalima)-Komisaun Nasionál ba Eleisaun (CNE) Munisípiu Covalima preparadu atu halo observasaun ba kampaña eleitorél ne’ebé sei hala’o husi kandidatura Prezidente Repúblika (PR) periodu 2022 no 2027 na’in rua ne’ebé hakat ba segundu volta.
Diretór CNE Munisípiu Covalima, Hermenegildo de Sena katak, eleisaun ba Prezidente Repúblika periodu 2022-2027 iha primeira ronde CNE preparasaun másimu ona ne’ebé tama ba segunda volta CNE preparadu.
“Preparasaun ba eleisaun segundu volta ne’e liliu kapasitasaun ba Ofisiál Supervizaun Eleitorál (OSE) ne’e internál de’it ona ami sei la konvida sira husi nasionál atu mai fó tan kapasitasaun, maibé ami iha ne’e mak halo rasik hanesan briefing de’it ona ba staff CNE sira ne’ebé foin lalais rekruta iha eleisaun primeira ronde nian,” katak Diretór Hermenegildo ba jornalista sira iha knar fatin, Kuarta (30/03).
Hakat ba segundu volta, parte CNE sente kaman, tanba iha de’it ona kandidatura na’in rua ne’ebé sei observa ba iha kampaña eleitorál sei hala’o iha loron 2 to’o 16 fulan Abril 2022.
“Ho kandidatura na’in rua ne’ebé sei hakat ba segundu volta ne’e hanoin la difikulta ona parte CNE atu hodi hala’o servisu iha terenu,” Nia tenik.
Iha primeira ronde CNE hasoru difikuldade iha atividade kampaña liliu ba ekipa susesu husi kandidatu na’in 16 nian ladun apar ho situasaun ne’ebé parte CNE fó hatene, loloos atu manda kalendáriu mini kampana iha loron 15 nia laran, maibé realidade hatudu ekipa susesu sira ohin mai halo aprosimasaun aban hanesan ne’e halo kedas atividade mini kampaña, loloos ne’e labele.
“Ida ne’e sai hanesan referénsia ida mai CNE Munisípiu Covalima toma nota depois mak sei relata ba komisáriu sira iha nasionál ho nune’e bele foti solusaun ruma kona-ba situasaun ida ne’e iha sira-nia plenária altu nível,” nia esplika.(*)
