Tempotimor (Covalima)–Tuir Diretór interinu Servisu Saúde Munisípiu Covalima, Agapito de Jesus katak, hahú fulan janeiru to’o fulan marsu tinan ne’e, Servisu Saúde Munisípiu Covalima rejista ona kazu tuberkulozu hamutuk 60.
“Kazu tuberkulozu iha fulan tolu ne’e ita rejista kazu hamutuk 60 iha Munisípiu Covalima”, Diretór interinu ne’e hato’o ba www.tempotimor.com iha salaun Administrasaun Munisípiu Covalima. Horseik (06/04).
Liga ho kazu ne’e nia husu ba xefi sentru saúde iha munisípiu Covalima atu tau atensaun maka’as ba pasiente tuberkulozu hodi halo tratamentu.
Pesoál saúde ne’e mós afirma, tékniku laboratóriu no autoridade lokál tau atensaun, bainhira realiza enkontru iha sede suku sira tenke tau ajenda hodi ko’alia mós kona-bá moras ne’e ba komunidade sira.
“Tenke tau konsiderasaun ba moras TB tanba durante fulan tolu ita deteta ona hamutuk kazu 60, maibé seidauk hatene iha ita-nia aldeia no bairru sira . TB moras ida ne’ebé da’et perigu no pasiente balun hahú muta ran hodi hatudu liman ba pesoál saúde, maibé saúde iha ita nia liman la’os iha médiku no xefi sentru saúde nia liman,” katak Nia.
Pesoál saúde durante ne’e hasoru difikuldade liu-liu laiha trasporte no uza de’it trasporte privadu hodi hala’o servisu no menus ekipamentu hodi deteta moras tuberkulozu.
“Ami hasoru problema boot tanba liga ba ekipamentu difikulta ami nia tékniku laboratóriu bainhira atu halo teste ho ida husu ba manejer karik bele tau planu nune’e ami bele halo tratamentu,” nia informa.
Alende ne’e, xefi programa tuberkulozu nasionál, Costantino Lopes promete sei tau ba planu relasiona ho problema ne’ebé servisu saúde munisípiu Covalima.
“Ohin Diretór Interinu ko’alia kona-ba apoiu lójistiku ne’ebé sai problema nafatin iha munisípiu Covalima ami tau ona makina GN expert atu deteta moras tuberkulozu ne’ebé la’os iha Covalima de’it maibé mós munisipiu sira seluk atu halo diagnostika ne’ebé mak ho rapidu, la presija hein tempu ho de’it minitu 20 bele fó sai ona nia rezultadu, maibé ekipamentu ida de’it sei la sufisiente hodi halo atendementu,” katak Nia.
Kona-ba apoiu trasporte programa tuberkulozu nasionál sei konsidera hodi haree planu presija aumenta. Maibé ransporte sei apoiu fazeadamente, motor balun apoiu uluk atu apoiu nafatin.(*)
