Tempotimor (Covalima)-Segunda-feira (11/04/2022) ne’e governu liuhusi Ministériu Administrasaun Estatál (MAE) distribui ona materiál informátika ba suku 30 iha munisípiu Covalima.
Tuir Diretór Jerál Dezenvolvimentu Rurál (DJDR), Rosito Guterres katak, distribui materiál informatika ba xefi suku sira, iha munisípiu Covalima atu hakmaan no aselera administrasaun iha suku sira.
“Ohin entrega materiál informátika ho pakote komputadór ida, printer ida no UPS ida, no materiál informatika hirak ne’e instalaladu ona sistema ne’ebé xefe suku sira atu uza hodi atende ita-nia komundidade iha prosesu adminsitrasaun, tanba durante ne’e ita haree inan faluk sira mai husi foho hodi trata deklarasaun suku, espera ho ekipamentu refere bele atende ho efisiénsia liután,” informa DJDR, Rosito hafoin distribui materiál hirak ne’e ba autoridade komuitáriu sira, Ohin (11/04).
Governu distribui materiál refere atu fasilita servisu xefi suku sira-nian iha sede suku hodi hala’o atendementu ba komunidade sira iha suku bazeia ba preokupasaun xefi suku sira-nian.
“Distribuisaun materiál informátika ba ita-boot sira, bazeia ba preokupasaun hosi xefi suku sira ne’ebé durante hato’o liuhusi vizita eis Prezidente Repúblika (PR), atuál Primeiru-Ministru (PM), Taur Matan Ruak, nune’e ohin realiza ona ne’e,” nia hateten.
Materiál informátika ne’ebé distribui ba xefi suku 30 iha Munisípiu Covalima, mak hanesan, komputadór ida ho marka Dell, printer ho marka HP no UPS ba suku 30. No governu mós sei fasilita formasaun ba xefe suku sira kada postu administratuvu sira nune’e xefe sira bele iha koñesementu kona-ba utilizasaun materiál informátika.
Diretór jerál ne’e mós afirma, relasiona ho reabilitasaun ba sede suku sira ne’e falta de’it sede suku 52 mak seidauk halo rehabilitasaun.
“Ha’u fiar suku 30 iha Covalima laran balun halo ona rehabilitasaun, tanba sede suku iha Timor hahú konstrui iha 2006-2007 nia kondisaun ladi’ak ona, entaun tempu ona atu hadi’a sede suku sira ne’e,” nia haktuir.
Iha fatin hanesan Xefi Suku Mudemo, Maria Fátima kontente bainhira simu materiál informátika hosi governu hodi fasilita sira-nia servisu iha sede hodi halo atendementu ba komunidade sira.
“Ami kontente bainhira governu distribui materiál informatika mai ami maibé presiza fó formasaun ami tanba ami seidauk hatene atu utiliza halo operasaun ba komputadór,” nia hateten.
Entretantu iha serimónia distribuisaun ne’e partisipa husi Administradór Munisípiu Covalima, Administradór postu administrativu hitu, diretór munisípiu sira no xefi suku 30 inklui Pesoál Apoiu Administrasaun Suku (PAAS) ne’ebé pertense iha Munisípiu Covalima.(*)
