Tempotimor (Covalima)-Prezidente Komisaun Organizadora ba komemorasaun loron Restaurasaun Independénsia Timor-Leste Francisco Alves katak, povu Covalima sei selebra loron importante ne’e ho atividade desportu tradisionál no bazar kalan.
“20 de maiu ba tinan ne’e ita iha munísipiu Covalima, realiza atividade eventu tradisionál no basar kalan atu anima povu Covalimaoan sira, nune’e sira bele partisipa máximu iha loron importante ne’e,” Dehan Francisco Alves nu’udar prezidente KO ba eventu refere, Tersa (26/04).
Nia Husu ba komunidade sira ne’ebé atu partisipa geira iha ámbitu komemorasaun loron Restaurasaun Independénsia ba dala-20 iha munísipiu Covalima, atu hakbesik-aan ba komisaun organizadora hodi rejista iha sesaun bazar kalan, atu nune’e bele promove grupu no servisu sira ne’ebé iha.
“Husu mós ba komunidade sira tenki partisipa iha bazar kalan iha ámbitu komemorasaun ne’e, komunidade hakbesik-aan ba komisaun organizadora atu nune bele promove grupu no servisu sira ne’ebé komunidade sira kria,” tenik Francisco.
Entretantu orsamentu ne’ebé atu aloka ba serimónia ne’e, ekipa komisaun organizadora seidauk deside, tanba inísiu fulan maiu maka komisaun sira foin konvoka reuniaun hodi halo diskusaun.(*)
