Jura ba Bíblia, Pe. Sebastião Husu Membru Grupu Moris iha Dame no Domin

Reprezentante grupu arte marsiais no rituais halo juramentu iha Bíblia hodi halakon konflitu iha Munisípiu Covalima, Sábadu (30/04). Foto Tempo Timor

Tempotimor (Covalima)-Sábadu (30/04/2022) ohin Grupu Arte Marsiais (GAM) ho Grupu Arte Rituais (GAR) iha munisípiu Covalima hadame malu ona liuhusi juramentu ba Bíblia.

Hafoin juramentu, Amu Parókia Igreja Avê Maria Suai, Sebastião Eugénio da Cruz Correia katak, membru grupu arte marsias no rituais hadok an husi konflitu, tenke kria paz no estabilidade hodi moris iha domin no dame nia laran tuir doutrina fiar Katólika nian.

Read More

“Labele adora ita-nia grupu liu fali Maromak, se ita fiar na’in, labele hanoin aat ba malu, ita mesak Timoroan de’it, ita uma lisan ida de’it no avo ida de’it, ne’ebé liberdade uza atu halo di’ak, la’ós uza liberdade atu halo buat aat, se lae ita la’o ba mai la livre, nomós labele bosok ema, duun malu wainhira hasoru problema ruma, husu ba arte marsias sira tenke tuir ukun fuan sanulu habadak ba buat rua de’it, tenke hadomi malu,” Hateten Amu Parókia ne’e liuhusi omilia iha Igreja Avê Maria Suai, Sábadu (30/04).

Iha sorin seluk Presidente Komisaun Reguladora Arte Marsiais (KRAM), Octávio da Conceição husu ba arte marsiais no rituias ne’ebé eziste iha Covalima, atu kolabora ho governu, hodi kria paz, estabilidade para kontribui ba dezenvolvimentu iha Covalima,” dehan Prezidente KRAM ne’e.

“Husu ba treinadór sira tenke kontrola membru sira, nune’e bele hadook-aan husi konflitu, tenke kria paz no estabilidade hodi kontribui ba dezenvolvimentu i servisu hamutuk ho governu,” Nia dehan.

Enkuantu diretiva husi KRAM esplika, molok halo atividade treinu, kada organizasaun tenke halo resensiamentu ba membru sira hodi submete ba Sub-KRAM iha Covalima, hodi nune’e hafasil atu identifika membru ne’ebé komete krime.

Entretantu GAM ho GAR ne’ebé partisipa iha asaun dame malu liuhusi juramentu ba Bíblia ne’e mak PSHT, Kera Sakti, KORK, Taekwondo, Pajajaran, Rajawali, Karate, Konfu Master, inklui ho arte rituais hanesan 77, Kolimau 2000, Santo António no seluk tan, ne’ebe akompana husi Sekretáriu Administrasaun Munísipiu Covalima no Komandante PNTL Munisipiu, Superintendente Polísia Basílio de Jesus no konvidadu sira seluk.(*)

Related posts