Tempotimor (Covalima)-Tersa-feira (03/05/2022) ohin, Tribunál Distritál Suai (TDS), hala’o ona primeiru interogatóriu ba oknum UPM na’in neen ne’ebé komete hamate Julio Amaral iha janeiru 2022, iha suku Suailoro, postu Suai, munisípiu Covalima.
Hafoin remata primeiru interogatóriu ba oknum UPM na’in neen ne’e, advogadu privadu Manuel Tilman katak, primeiru interogatóriu ne’e rona de’it deklarasaun husi suspeitu na’in neen no suspeitu hirak ne’e sei kondena ho lei kódigu penal artigu 138.
“Ohin primeiru interogatóriu de’it ami rona de’it ema ida de’it, ema sira ne’ebé akujadu ne’e na’in neen kedas, ne’ebé sei falta na’in lima, ne’eduni julgamentu atu kotinua fali ne’e iha dia 11 semana oin entaun ha’u-nia kolega sira mak garantia hela, tanba dia 12 ha’u iha julgamentu ida iha Baucau,” dehan Advogadu Manuel Tilma ba jornalista sira iha TDS, Tersa (03/05).
Nia afirma, iha artigu 138 katak, kazu omesidu simples katak, oho ema ne’e pena mínimu mak tinan haat, no másimu mak tinan 20.
“Iha artigu balun ne’ebé juis balun dehan, tinan haat to’o tinan ualu, mas iha ne’eba ne’e husi tinan ualu to’o tinan 20, ne’eduni tamba omesidu ema ida lakon vida, maibe komu sira nega hela, ne’e ha’u hanoin sira sei la kondena nein tinan ida, ha’u hein, se sira kondena duni ba tinan ualu, hitu, neen ka lima de’it mos ha’u sei halo rekursu ba Tribunál Rekursu hodi hetan justisa loloos, tanba iha direitu,” Katak Nia.
Advogadu ne’e argumenta, iha kódigu penál ka sivíl so bele kondena ema ida hodi hetan kadeia tinan haat, lima ka neen, bainhira iha duni kulpa, maibé kuandu juis sira mak iha duvidas tenke absolve kazu ne’e.
“Kuandu ita mak duvida ka huis sira mak duvida, ita tenke absolve kazu ne’e. Ne’e mak lei ita nian, ita la kopia lei rai seluk ida, lae, ita iha segementu ho rai italianu ka rai ne’ebe de’it, mais ita-nia lei maka ida ne’e,” katak Nia.
Entretantu, kazu omesidu simples ne’e sei kontinua tuir julgamentu iha 11 maiu semana oin, no remata julgamentu gurda prizonais sira sei lori hikas arguidu hirak ne’e ba prizaun Suai hodi Hein prosesu tuirmai.(*)
