Tempotimor (Covalima)-Relasiona ho folin gazoliña ne’ebé sa’e iha munisípiu Covalima halo motorista ojek sira laran triste, tamba rendimentu hahú menus kada loron no afeta ba nesesidade sustenta familia.
Tuir motorista, Laurentino Amaral katak, rendimentu menus kada loron, entaun lato’o hodi sustenta familia. Depois kada loron hetan de’it rendimentu $11.00, kompara ho fali ho folin nesesidade báziku sa’e iha merkadu.
“Agora osan ne’ebé ami hetan husi atividade ojek ne’e ami uza ba nesesidade lor-loron lato’o, tamba folin sasan agora boot liu rendementu ne’ebé ami hetan, tamba ami ojek ne’e loron ida ami hetan de’it $11.00, sedangkan sasan ka aihan hanesan fos saku ida sa’e ba $14.50, mina masa ida husi $10.00 to’o $15.00, entaun ida ne’e ha’u senti susar tebes ba ami,” Dehan motorista Laurentino Amaral ba jornalista sira iha Merkadu Suai, Kuarta (04/05).
Nia hatutan, bainhira folin sasan báziku seidauk sa’e, rendimentu ne’ebé Kada motorista sira hetan sufisiente uza ba nesesidade uma laran, maibe depois de gazolina folin sa’e, rendementu ne’ebé hetan mihis liu no lato’o ona hodi sustenta nesesidade uma laran.
“Uluk mina ákua boot nakonu ne’e dollar $1.25 de’it, maibé agora ákua boot ne’e sa’e ona ba $2.50), tanba ne’e kona-ba folin ojek iha villa laran ami la’o kontinua ho estandar tuir distánsia, maibé la’o dook, ami aumenta folin husi $0.50 to’o $1.00, tamba la’o dook ne’e estraga mina barak, estrada aat no seluk tan,” Nia dehan.
Maske hasa’e folin ojek nian, maibé rendementu nafatin mihis, tamba loron ida hetan de’it dollar $11.00, entaun enxe tiha mina ho $4.00, entaun lori de’it oituan ba uma.
Motorista ne’e mós husu ba governu atu buka solusaun hodi nune’e folin gazoliña bele la’o normal filafali.(*)
