Tempotimor (Covalima)-Diresaun Jerál Estatístika (DJE) Nasionál fó treinamentu ba Pesoál Apoiu Suku (PAS) na’in 30 iha Covalima hodi hatene kona-ba métodu halo rejistu ba ema mate no ema moris.
Tuir Xefe Departamentu Estatistika Nasionál, Fernando Perreira katak, treinamentu ne’e ho objetivu atu kapasita Pessoal Apoiu Suku oinsa bele foti dadus ba ema mate no moris nian iha ida-idak nian suku.
“Ida ne’e hanesan kontinuasaun ba treinamentu ne’ebé hala’o ona iha 2014 no 2016, entaun agora mak foin tama iha terseira, nune’e sira bele priense formatu ne’ebé ami distribui husi Diresaun Jeral Estatistika liu-liu kona-ba rekolla dadus mortalidade, infortilidade depois imigrasaun internal no esternal,” dehan Xefe Departamentu ne’e ba jornalista sira iha Salaun Administrasaun Munisípiu Covalima, Kinta (05/05).
Nia hatutan, imigrasaun internal katak halo mudansa entre postu no munisípiu iha nasaun laran no imigrasaun external katak, ema husi estrajeiru tama iha Timor-Leste no husi Timor-Leste ba estranjeiru.
“Ita-nia tarjetu loloos atu kapasita sira kona-ba refresh training ka oinsa ita priense formatu ida ita update no atualizasaun ida ne’ebé ami halo iha 2014 ,maske buat ida últimu, maibé iha informasaun balun presija ita update husi treinadór para iha ema foun ruma, sira mós bele apar,” tenik Nia.
Iha sorin seluk Reprezentante Administradór Munisípiu Covalima (AMC), Fransisco Tatámero husu Pesoal Apoiu Suku sira atu labele sik de’it dadus populasaun, maibé tenke hatudu dadus ne’ebé loos.
“Husu ba PAS sira iha suku tolunulu tenke aprezenta ba munisípiu ne’ebé loos, labele naran sik de’it mak hatete, tanba dadus importante ba ita-nia Nasaun, hanesan bebé fulan ida ne’e moris hira no ema mate ne’e hira, para ita-nia dadus sempre mudansa, se lae mak apresenta dadus ida ne’ebé tinan kotuk nian ne’e nafatain aprezenta, entaun ida ne’e ba oin komesa hadi’a halo servisu ne’ebé di’ak,” Nia hakotu.(*)
