Tempotimor (Covalima)-Relasiona ho komemorasaun Restaurasaun Independénsia Timor-Leste ba dala-20, mak komisaun organizadora ba evente komemorasaun iha munisípiu Covalima realiza atividade rua hodi festeza loron importante refere.
Tuir Xefe Seksaun ba atividade Feira, Damião Amaral katak, atividade feira kalan ne’ebé atu komeora tinan 20 ba Timor-Leste nia ukun aan ne’e kuaze grupu sanulu resin mak halo ona rejistrasaun hodi fa’an sira-nia produtu lokál no produtu kulinária tradisionál.
“Seksaun feira kalan nian rejista ona grupu sanuru resin no grupu sira ne’e atu fa’an sira-nia produtu lokál no produtu kulinária tradisionál, entaun grupu sira ne’e mai husi Sentru Komunidade Covalima ne’ebé Ministériu Turizmu Komérsiu Industria (MTCI) mak apoiu inklui kios sira seluk,” Xefe Seksaun ne’e dehan ba www.tempotimor.com Ohin (10/05).
Nia komenta, feira kalan ne’e sei hahú iha loron 12 too loron 20 fulan maiu 2022, ne’ebé sei realiza iha kampu Futeboll Ladi.
Iha fatin hanesan Xefe Seksaun Desportu Komunitária, Muigel Armada hatutan, seksaun desportu komunitária mós halo ona identifikasaun ba kuda 30 ne’ebé asei hola parte iha halai taru ne’ebé sei kategór husi B to’o E.
“Husi parte ami-nia identuifika ona kuda tolunulu ne’ebé atu halai no kuda hirak ne’e ho nia kategória B. C. D no E,” Nia dehan.
Desportu komunitária hanesan halai kuda ne’e sei realiza iha suku Suailoro parte tasi ibun, maibé loron ne’ebé atu hahú seidauk deside.(*)
