Administradór Husu Povu Covalima Hasa’e Bandeira iha Uma Oin

Administrador Munisipiu Covalima, Francisco de Andrade.

Tempotimor (Covalima)-Atu komemora loron 20 de maiu ne’ebé nu’udar loron Restaurasaun Independénsia Timor-Leste ba dala-XX mak Administradór Munisípiu Covalima (AMC), Francisco de Andrade husu ba povu Covalima atu hasa’e Bandeira Nasional iha ida-idak nia uma oin.

“Antes ne’e fó ona avizu ba populasaun tomak, ne’ebé ida-idak iha dever moral tomak atu hasa’e Bandeira Nasionál iha uma oin, atu nune’e ita hanoin hikas ba 20 de maiu 2002, ne’ebé halo selebrasaun iha Tasi Tolu,” Administradór Fransisco dehan ba jornalista sira iha knaar fatin, Horseik (12/05).

Read More

Aman ba munisípiu Covalima ne’e afirma, hela de’it loron ualu povu Timor tomak atu selebra loron importante ne’ebé Timor-Leste kore aan husi Indonézia hodi afirma aan nu’udar nasaun soberanu ida iha mundu. Alende ne’e povu Timor-leste mós sei simu Prezidente Repúblika eleitu José Manuel Ramos Horta ne’ebé iha loron 19 abril fulan kotuk povu maioria fó ona konfiansa liuhusi eleisaun prezidensiál iha volta daruak.

Enkuantu investidura ba PR foun ne’e sei hala’o husi Parlamentu Nasionál ne’ebé lidera husi Prezidente Parlamentu Nasionál (PPN), Aniceto Longuinhos Guterres iha oras 00h:00 iha Tasi Tolu.

Entretanto liga ho apelu autoriedade Covalima nian ne’e, www.tempotimor.com observa direta iha terenu katak, komuniadde maioria hasa’e ona bandeira nasionál iha ida-dak nia uma inklui fatin públiku sira.(*)

Related posts