Tempotimor (Covalima)-Relasiona ho komemorasaun 20 de maiu no Restaurasaun Independénsia ba dala-XX iha munisípiu Covalima ne’ebé mestre ba serimónia duni sai jornalista husi kampu serimónia mak Prezidente Komisaun (KO) husu deskulpa no rekoñese katak la prepa ho di’ak.
Tuir Sekretáriu Administrasaun Munísipiu Covalima (AMC), Fransisco de Jesus Alves nu’udar prezidente Komisaun Organizadora (KO) ba eventu komemorasaun ne’e husu deskulpa ba média lokál no nasionál.
“Jornalista barak liu mak hasai imagem no vídeo bainhira Inspetór da serimónia halo pasa revista, entaun hetan taka dalan, tanba ne’e ita-nia protokolu husu ba maluk jornalista sira atu retira ka hamamuk fatin kampu laran ne’e, ho razaun tanba normalmente serimónia hanesan ne’e, jornalista sira iha fatin ne’ebé própriu atu bele hasai filmajen ka foto, maibé momentu ne’e la dun organizadu, hotu hotu tama ba laran hadau malu, iha mos balun la’ós jornalista, maibé uza telefone tama hotu ba laran halo barullu, ita haree ba ladun disiplina,” Prezidente KO ne’e husu ko’alia ho jornalista sira iha Kampu Ladi, Sesta (20/05).
Nia subliña, situasaun ne’e Sai nu’udar esperiénsia ida, atu nune’e ba oin Komisaun Organizadora prepra fatin própriu ida ba jornalista sira, atu nune’e labele repete tan.
“Ida ne’e hanesan esperiénsia ida ba ita, tanba jornalista sira ne’e importante tebes iha seremonia ida hanesan ne’e, tanba jornalista mak bele hatutan ba komunidade sira iha ne’e no balu la konsege mai hodi bele asiste husi média elektronika ka hakerek,” Nia tenik.
Nia mós premeta, ba oin sei hadi’ak liután liuhusi preparasaun hodi nune’e jornalista sira bele asesu livre iha serimónia hotu.
“Komisaun Organizadora hakarak husu deskulpa ba ita-boot sira, tanba ami la prepra fatin própriu ba ita-boot sira, ne’ebé ida ne’e hanesan esperiénsia ida ba ami, maibé ha’u hanoin ba oin, prepara fatin própriu ida ba ita-boot sira bele livre foti imagem ka video iha seremonia hanesan ne’e husi hahu to’o remata,” Nia hakotu.(*)
