CNR Orienta Autoridade Lokál Identifika Difisiénsia Sira Iha Área Rurais

Diretora Jerál CNR, Verónica das Dores ko'alia hela ho jornalista sira iha suku Ogues, Postu Tilomar, Tersa (24/05). Foto Tempo Timor

Tempotimor (Covalima)-Sentru Nasionál Reabilitasaun (CNR) ne’ebé tutela iha Ministériu Solidariedade Sosiál no Inkluzaun (MSSI) prontu apoiu ema ho difisiénsia sira iha munisípiu Covalima bainhira hakarak hetan asisténsia husi sentru.

Diretora Jerál CNR, Verónica das Dores hateten, durante ne’e CNR apoiu ona ema ho difisiénsia rihun 10-resin iha teritóriu nasionál, tanba ne’e husu ba autoridade lokál sira iha munisípiu Covalima, atu identifika ema ho difisiénsia iha suku no Aldeia nune’e CNR bele fó asisténsia.

Read More

“Ema ho Difisiénsia rihun sanulu resin maka ami apoiu ona, liliu ema ne’ebé difisiénsia fízika, sira ne’ebé presiza ai-tonka, kadeira roda, nomós bebe oan sira ne’ebé maka “klafut” bainhira moris mai. Ne’e duni husu ba autoridade lokál sira tenke identifika EhD iha suku no aldeia depois bele kontaktu ami liuhusi ami-nia pájina para ami bele halo atendimentu, karik identifika ami prontu apoiu transporte para lori ba iha Sentru Nasionál Reabilitasaun no ami mós bele mai foti sira iha ne’e, depois sira hela iha dormitóriu no ami sei fó apoiu depois asesmentu hotu ami lori sira mai fali Suai,” Veronica dehan ba jornalista sira iha suku Ogues hafoin halo sosializasaun ba komunidade sira, Tersa (24/05).

Iha fatin hanesan, Koordenadór Raes Hadomi Timor Oan (RHTO) iha Covalima, Honorio Gusmão relata RHTO Covalima, to’o agora rezista ona ema ho difisiénsia 302 no husi totál ne’e na’in 10 maka hetan ona apoiu husi Sentru Nasionál Reabilitasaun.

“Ema ho difisiénsia ne’ebé maka ami rejista ne’e agora dadaun hamutuk 302, husi total ne’e na’in 10 maka hetan ona apoiu husi CNR hanesan ain falsu, liman falsu nomós kadeira roda,” Honorio hakotu.(*)

Rezista Dadus EhD, RHTO Husu Tulun ba Autoridade Lokál – Tempo Timor Suai

Related posts