Tempotimor (Covalima)-Atu habelar pratika prinsípiu konservasaun agrikultura maka Ajénsia Internasionál Aihan Mundiál, Organizasaun ba Agrikultura no Alimentasaun (FAO) organiza sorumutu entre to’os na’in no governu liliu Ministériu Agrilultura no Peskas (MAP) hodi haree rasik rezultadu Asosiasaun Produtór Fini Lahakfodak ne’ebé aplika ona kuda lehe iha suku Kasabauk, postu administrativu Tilomar, munisípiu Covalima.
Iha sorumutu ne’e, Xefe Asosiasaun Produtór Fini Lahakfodak, Octaviano Maia dehan, programa tékniku konservasaun agrikuktura ne’e eziste de’it iha Zumalai, maibé tanba konsidera iha benefisiu no importante ba agrikultór hotu, nune’e maske suku Kasabauk la’os área tarjetu ba programa ne’e, maibé ho inisiativu rasik hodi harii grupu ne’e hodi bele aprende kona-ba konservasaun agrikultura iha suku Kasabauk.
“Ami la’os parte ida husi área tarjeitu, maibé husi formasaun ne’ebé ami tuir mak ami iha inisiativa rasik atu halo ida ne’e, tanba ami haree iha Tilomar liliu iha suku Kasabauk ne’e rai ida ne’ebé poténsia tebes atu halo to’os, tanba ne’e ami inísia ida ne’e pois ami hakbesik an ba FAO hodi buka apoiu ba ida ne,” Xefe grupu ne’e informa ba jornalista iha Kasabauk, Tersa (24/05).
Octaviano akresenta, objetivu kuda lehe ne’e atu haforsa rai nia bokur hodi nune’e bele aumenta rezultadu husi produtor sira. Tanba to’os hektares ida bele mak kuda hotu batar, nia rezultadu bele to’o tonelada 100-resin.
“Kuda lehe nia benefisiu boot tebes, ita kuda iha to’os hektar ida, to’o tempo ida kolleta bele hetan rezultadu to’o tolada 100-resin, maibé ami-nia preokupasaun mak tratór ho rolling, tanba iha iha Covalima so iha rolling ida de’it, tan ne’e ami husu ba MAP atu apoiu tan tratór rua ho rolling mai iha Covalima liliu iha Kasabauk,” Octaviano subliña.
Hatán ba preokupasaun ne’e, Vise Ministru Agrikultura no Peskas (V-MAP), Abilio Xavier de Araújo promete sei komunika ho Ministru Agrikultur no Peskas (MAP), Pedro dos Reis tanba asuntu refere kontrulu no tutela direta ba MAP.
“Preokupasaun ne’e ami sei komunika ho Ministru, tanba asuntu ne’e kontrolu no tutela direta ba ministru, no ami sei relata fila hodi tau konsentrasaun másimu liliu iha munisípiu sira ne’ebé área produtivu, ne’e ha’u hanoin importante, ita hotu hatene, ministériu sempre tau preokupasaun sira ne’ebé iha, tanba ne’e iha mós preokupasaun balun mak ita atu prevé orsamentu iha tinan 2023,” Nia dehan.
Enkuantu partisipantes ne’ebé partisipa iha sorumutu ne’e mak Vise-MAP, Prezidente Komisaun D, Parlamentu Nasionál (PN) ne’ebé trata Asuntu Ekonomia no Dezenvolvimentu, Administrador Munisípiu Covalima, Segundu Komandante PNTL Covalima, Diretór MAP Covalima, Rep. Administradór Postu Administrativu Tilomar, Asistente Reprezentante FAO, Xefe suku Kasabauk no Lalawa, Reprezentante F-FDTL, Diretór liña Setorál sira no Komunidade to’os na’in.(*)
