MAP Kolleta Hare Hektares 1,624 Iha Raimea Covalima

Tempotimor (Covalima)-Ministru Agrikultura no Pesca (MAP) Pedro DOS Reis no adjunta Xefe Kaza Sivíl Prezidente Repúblika, Henriqueta Maria da Silva kolleta hare hamutuk hektares 1.624 inklui hare hektares 120 iha aldeia demo ne’ebé utiliza adubu orgániku hanesan pok nasa, supernasa no armonik.

Read More

“Ita nia problema ne’ebé durante ita hasoru mak fornese bee ba natar tanba ne’e ami ko’alia ona planu iha grande opsaun ne’ebé suporta husi Parlamentu Nasionál tanba natar iha suku Raimea hektar 2000-resin maibé ita dezenvolve de’it hektares 1.000-resin, tanba menus fornese bee ba natar,” Ministru MAP, Pedro DOS Reis dehan hafoin kolleta ba hare, iha suku Raimea, postu Zumalai, horseik (06/06).

Governante ne’e argumenta, governu sei la konstrui irigasaun boot hodi responde problema ne’ebé komunidade natar na’in infrenta, maibé governu sei esforsu hodi destaka mákina pezadu hanesan eskavadór lokaliza iha Covalima hodi fasilita bee ba agrikultór sira-nia natar nune’e bele hasa’e produsaun rai laran.

Produsaun ne’ebé agrikultór sira produs, Ministériu Agrikultura no Peskas (MAP) sei servisu hamutuk ho Ministériu Koordenadór Asuntu Ekonómiku (MKAE) no Ministériu Turizmu Komérsiu no Industri (MTKI) sei kompras hodi implementa ba programa Sesta Bázika ne’ebé tuir lei 75% tenki ho produtu lokál.

Iha fatin hanesan, Adjunta Xefe Kaza Sivíl Prezidente Repúblika, dehan, xefe estadu iha programa lubuk ida atu promove produtu lokál.

“Xefi estadu iha programa importante lubuk ida inklui oinsa atu promove produtu lokál nomós atu asegura ita-nia nasaun ida-ne’e bele iha ai-han sufisiente,” Nia dehan.

Henriqueta akresenta, Xefe Estadu mós iha polítika hodi fó atensaun ba labarik no inan isin-rua hodi nune’e bele produs jerasaun di’ak iha Timor-Leste.

“Ho intesaun katak se labarik inan isin-rua ladun han aihan ne’ebé nutriente ita sei la produs jerasaun ne’ebé di’ak iha nasaun ne’ebé hodi bele prienxe dezenvolvimentu ne’ebé ita hasoru, tanba atu kombate má nutrisaun, promeve ai han lokál no ai-han ne’ebé nutrisaun di’ak tanba ne’e servisu hamutuk ho WFP, MAP Embaxadór Brazil sira, ne’ebé buka fundu hodi apoiu governu,” Nia dehan.

Enkuantu iha Serimonia kolleta hare ne’e partisipa husi Ministru Agrikultura no Peskas ho nia ekipa, Adjunta Xefe Kaza Sivíl Prezidente Repúblika, Embaizadór Brazil iha Timor-Leste, Reprezentante husi JICA Diretores Munisipál, Autoridade Lokál no komunidade sira iha munisípiu Covalima.(*)

Related posts