Tempotimor (Zumalai)- Xefi Suku Tazhilin postu administrativu Zumalai munisípiu Kovalima, Martinho Magno sente orgullu ho Sekretária Estadu Kooperativa (SEKoop), ne’ebé hili ona nia suku hodi halo lansa lansamentu dahuluk ba sosa no distribuisaun produtu iha programa Sesta Bázika.
“Ida ne’e mak ha’u nu’udár lideransa komunitária, sente orgullu tebtebes”, Martino Magno espressa ninia sentimentu kontente ba www.tempotimor.com, iha sede suku Tazhilin, sabádu (07/11).
Hanesan autoridade lokál Martinho reprezenta suku hotu-hotu iha postu administrativu Zumalai, hakarak agradese ba governu, liuliu ba program aida ne’e.
Partisipa iha lansamentu ne’e, Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, ne’ebé hateten katak, nia parte akompaña didiak programa ne’e desde inísiu la’o diak tebes, nune’e sei defende programa ne’e iha Parlamentu Nasionál.
“Hau akompaña implementasaun programa ne’e, sei defende iha PN”, Francisco hateten.
Entretantu totál populasaun iha suku Tazhilin hamutuk ema na’in 2.895, no totál populasaun ne’ebé simu produtu lokál hirak ne’e hamutuk 2.853.
