Tempotimor (Zumalai)- Uma-kain hamutuk hitu iha suku Tazhilin, postu administrativu Zumalai, munisípiu Kovalima labele asesu ba programa sesta bázika tanba antes ne’e uam-kain hirak ne’e mós tama iha lista reklamasaun subsidiu Covid-19, no to’o oras ne’e seidauk iha rezultadu husi Ministériu Administrasaun Estatál (MAE).
“Sira balun la hetan tanba natoon rejístu atu hetan osan Covid-19 nian ne’e, sira nia dadus latama iha Ministériu Administrasaun Estatál. Signifika, dadus ne’e bazeia ba dadus anteriór nian”, Xefi Suku Tazhilin Martinho Magno hateten ba www.tempotimor.com, iha sede suku Tazhilin, postu administrativu Zumalai, sábadu (07/11).
Nia dehan, razaun Uma-kain hitu ne’e labele simu produtu husi governu, tanba lísta naran ne’ebé haruka ba MKAE ho SEKoop, bazeia ba dadus anterior ne’ebé sira hatama ba iha MAE.
“Dadus ne’e ami hatama bazeia ba dadus subsídiu Covid-19 ne’ebé mak sira reklama, seidauk iha rezultadu. Tanba ne’e maka iha sesta bázika mós sira labele hetan”, nia esplika.
Maski nune’e, autoridade lokál ne’e iha ona hanoin oinsa komunidade bele hetan hotu, tanba iha dadus balun mós momentu subsidiu covid-19 ne’e halo reklamasaun, maibé to’o oras ne’e MAE seidauk fó rezultadu, no nia fiar katak sira sei hetan hotu.
Entretantu númeru populasaun iha suku ne’e hamutuk 2.853.
