Tempotimor (Covalima)-Liga ba Eleisaun Prezidensiál (ElPres) ne’ebé sei akontese iha loron 3 fulan marsu tinan ne’e, mak Admimistradór Munisípiu Covalima (AMC), Francisco de Andrade husu ba joven sira atu kontribui ba estabilidade durante iha kampaña to’o eleisaun prezidensiál remata.
“Husu ba joven sira katak, tau iha imi-nia kakutak estabilidade ne’e importante, seguransa la’ós iha PNTL nia liman, maibé iha ita-nia liman, nu’udar sidadaun di’ak tenke iha kontribuisaun ba nasaun ida ne’e liuhusi estabilidade,” dehan Administradór Francisco ba jornalista sira iha salaun CNE Kampung Baru, Kinta (24/02).
Francisco akresenta, sidadaun hotu iha partidu, maibé objetivu dezenvolvimentu ba nasaun ida ne’e, maibé sidadaun sira-nia kontribuisaun ba estabilidade ne’e importante tebes iha munisípiu to’o iha postu administrativu sira.
“Ita hotu iha partidu, ita-nia objetivu mak dezenvolvimentu ba nasaun ida ne’e, kontribuisaun sidadaun hotu ida ne’e importante, ita garante estabilidade iha munisípiu to’o iha baze la’ós de’it iha munisípiu,” dehan Nia.
Aman ba munisípiu Covalima ne’e mós oriente ba lideransa komunitáriu sira iha postu administrativu hitu hodi habelar informasaun ba joven no komunidade sira iha suku to’o aldeia, hodi kria paz no estabilidade durante kampaña to’o eleiesaun prezidensiál.
Ba kestaun ne’e, Segundu Komandante PNTL Munisípiu Covalima, Superintendente Asistente, Albino Mauzinho reforsa, PNTL Covalima prontu no garante seguransa durante kampaña to’o eleisaun prezidensiál.
“Ami prontu ona servisu hamutuk ho autoridade lokál no juventude hothotu haree ita-nia seguransa adekuadu ne’ebé mai husi ita ida-idak nia liman ba kampaña to’o hakat ba sentru votasaun no sidadaun sira ho konsiénsia rasik ezerse sira-nia direitu tuir kandidatura ne’ebé nia hakarak,” katak Mauzinho.
Segundu komandante ne’e hatutan, Ofisiál Polísia Suku (OPS) nu’udar liman no ain ba komunidade sira hodi fó konsellu ba juventude no komunidade sira para moris iha estabilidade.
“Seguransa iha ita-nia liman rasik no OPS sai hanesan ita-nia liman ain, ne’ebé ita tau fiar no hetan formasaun oioin no hamutuk ho PNTL iha momentu ita desloka ba sentru votasaun, ita Covalima tau ita-nia neon ida, laran ida, lori Covalima la’o ba oin ho prospriedade,” Nia hateten.
PNTL hala’o nia servisu hodi fó seguransa tuir lei ne’ebé vigór ona iha Timor-Leste ne’ebé hakerek ona iha konstituisaun RDTL artigu 147 ne’ebé fó kompeténsia hodi garante seguransa ba sidadaun sira. 1. Polísia sei defende legalidade demokrátiku no garante sidadaun sira-nia seguransa internu, maibé sira labele iha partidu polítiku. 2. Prevensaun kriminál tenke hala’o ho respeitu ba direitus umanus. 3. Lei maka sei harii rejime ba polísia nomós forsa seguransa seluk.(*)
