Estajiáriu UNTL Partilla Informasaun ba Estudante Finalista iha ESCAM

Estudante Finalista husi ESCAM partisipa hela formasaun ne'ebé estajiáriu sira husi UNTL oferese, Kuarta (08/06). Foto Tempo Timor

Tempotimor (Covalima)-Estajiáriu husi Fakuldade Siénsia Saúde (FSS), Universidade Nasionál Timor Lorosa’e (UNTL) partilla informasaun ba estudante finalista husi Eskola Sekundária Katólika Avê Maria (ESCAM-sigla Portugues) Suai relasiona ho prosesu estudu iha nível ensinu superiór.

Read More

Tuir Koordenadór estajiáriu, Benjamin Ximenes Cabral hateten, atividade formasaun ne’e realiza ho objetivu atu komemora loron Restaurasaun Independénsia Timor-Leste ba dala-XX, tanba ne’e estudante estajiáriu sira fahe informasaun espesífiku liga ho siénsia saúde.

“Espesífiku husi ami-nia atividade ida ne’e atu fahe informasaun ba estudante sira husi ESCAM nian liga ho matéria Farmásia, Nutrisaun no Dietétika (FND), Siénsia Biomedikas (SB) no Laboratorais atu nune’e estudante sira akaba iha ensinu sekundáriu bele iha koñesimentu naton kona-ba saúde nian bainhira kontinua sira-nia estudu iha nível ensinu superiór,” Koordenadór Estajiáriu ne’e informa ba jornalista sira iha knaar fatin, Kuarta (08/06).

Iha fatin hanesan estudante, Maria dos Reis Cardoso senti kontenti tamba liuhusi formasaun ne’e bele hakle’an liután sira-nia koñesimentu iha área saúde.

“Ha’u sente kontente tebes maun ho bin sira-nia prezensa sira husi Fakuldade Medisina UNTL nian, tamba liuhusi sira-nia formasaun ne’e ami bele hatene oinsa lala’ok aprendisajem husi saúde nian no ami mós bele hatene oinsá atu tama iha ne’ebá no oinsá lala’ok saúde nian, tanba agora ami finalista iha tinan ne’e,” Estudante Maria espresa ho kontente.

Entratantu formasaun ne’e realiza iha salaun ESCAM, partisipa husi estudante finalista husi Eskola Sekundária Katólika Avê Maria Suai inklui estajiáriu na’in 70.(*)

Related posts