Durante Fulan Lima, DNJRD Rejista Kazu DN 50

Vítima Lino de Jesus Nia uma no mebel fatin ne'ebé ahi han Mutuk iha suku Suailoro. Foto Tempo Timor

Tempotimor (Covalima)-Diresaun Nasional Jestaun Risku Dezastre (DNJRD) liuhusi Servisu Jestaun Risku Dezastre (DJRD) Munisípiu Covalima rejista  kazu dezastre naturais husi janeiru to’o maiu 2022 hamutuk limanulu.

Tuir Koordenadór SJRD munisípiu Covalima, Dinis Ferreira hateten, kazu dezastre naturais ne’ebé husi parte SJRD rejista ne’e hetan estragus husi anin boot mak númeru as liu.

Read More

“Tipu dezastre ne’ebé ami rejista mak hanesan be sa’e, rai halai, anin sobu no ahi han uma. Husi tipu dezastre haat ne’e tuir dadus katak anin sobu mak númeru boot liu ho totál 33, tuir fali be sa’e iha 9, ahi han uma iha 6 no rai halai iha rua,” Koordenadór SJRDMC ne’e informa ba www.tempotimor.com via telefone, Ohin (10/06).

Kooredandór ne’e afirma, dadus hirak ne’e la’ós mai husi postu balun de’it, maibé postu hitu iha munisípiu Covalima hotu mak ekipa SJRD rejista.

“Iha postu Zumalai anin sobu iha 11, ahi han iha ida, iha postu Tilomar anin sobu iha tolu, ahi han iha ida, iha Fohorem anin sobu iha 10, rai halai iha ida, iha Fatululik anin sobu iha hat, iha Maukatar be sa’e iha ida, anin sobu iha rua, rai halai ida no ahin han iha ida enkuantu iha postu Suai bee sa’e iha ualu, anin sobu iha rua, no ahi han iha ida,” Nia aprezenta.

Dinis informa husi dadus dezastre ne’ebé iha nível estragus aat kaman iha 12, aat naton iha tolu no aat total iha 25.

“Dadus n ne’ebé ami foti iha Zumalai aat kaman iha haat, aat totál iha sia, ba fali iha Tilomar estragus aat kaman iha ida, aat naton iha ida, aat totál iha rua, iha Fohorem nível estragus aat total iha hitu, at kaman iha haat, iha Fatululik aat totál iha rua, aat kaman iha rua, iha Maucatar nível estragus aat totál iha haat, aat naton no at kaman laiha, iha postu Suai aat total iha ida, aat naton ida no aat kaman mós iha ida,” Nia esplika.

Relasiona ho dadus hirak ne’ebé Servisu Jestaun Risku Dezastre Munisípiu Covalima, mak husi parte ekipa hato’o ona proposta ba nasionál atu hetan material konstrusaun hodi fahe ba vítima sira ne’ebé  hetan estragu husi dezastre.(*)

Related posts