Tempotimor (Covalima)-Bazeia ba rejime espesiál ne’ebé garante Guarda Floresta servisu hamutuk ho Food and Agriculture Organization (FAO) of the United Nations hodi harii grupu floresta komunitária iha suku Maudemo, postu administrativu Tilomar atu prevene tesi ai arbiru.
Tuir Diretór Nasionál Floresta, Mariano Godinho, objetivu husi atividade ne’e, hodi forma grupu iha suku, nune’e involve komunidade dezenvolve iha área florestal.
“Ohin ita forma grupu ida ho nia estatutu klaru ho ninia estrutura kompletu, ne’ebé ida ne’e programa pilotu ida husi FAO nian, oinsa atu involve komunidade no desenvolve iha floresta liliu floresta komunitária, tanba ita-nia rejime jerál florestal katak, partisipante komunidade iha dezenvolvimentu floresta importante tebes, artigu 3 nú. 6 no 9 ne’ebé importante tebes,” Hateten Diretór Nasionál Floresta Mariano ba jornalista sira iha suku Maudemo, Kinta (23/02).
Iha fatin hanesan, enkaregada programa FAO iha Timor-Leste, Paula Lopes da Cruz katak, atu halo dezenvolvimentu iha área florestál, FAO fó formasaun ba komunidade husi suku Maudemo hodi forma floresta komunitária.
“Ida ne’e prosesu ida atu involve komunidade sira iha dezenvolvimentu iha área floresta nian, liliu atu fó kompeténsia ba sira para aliende fó formasaun prepara sira hametin sira-nia kapasidade, para sira bele iha kbi’it iha nesesáriu halo jetaun no halo utilizasaun sustentável área florestal iha sira-nia suku no postu laran, nune’e atu formaliza grupu utilizadór florestal komunitária iha suku Maudemo, tanba durante fulan ida tomak sira tuir formasaun hetan ona asisténsia téknika atu hakerek estatutu sira-nia planu jestaun florestal no deside sira-nia prioridade,” katak Nia.
Iha fatin hanesan, xefe Grupu Wecase floresta komunitária suku Maudemo, Natalino do Rego Tilman Pires sente kontenti, tanba husi FAO fasilita ona formasaun no bele hari ona grupu hodi eziste floresta iha suku Maudemo.
“Ami-nia grupu ne’e harii ona estatutu no estrutura ba grupu ne’e rasik, atu fiskaliza ba planu kona-ba área floresta nian, hodi hala’o programa ne’e di’ak no sustentável iha ami-nia suku rasik, entaun komunidade sira ne’ebé la kumpri regras ka tesi ai arbiru sei fó sansaun ba sira ka multa, ne’ebé husu komunidade tenke hadomi ambiente hadomi floresta hanesan hadomi ita-nia aan rasik,” dehan Nia.(*)
