Tempotimor (Covalima)-Tuir Administradór Munisípiu Covalima (AMC), Fransisco de Andrade katak, konstrusaun Uma Kbi’it Laek (UKL) iha Covalima la’o tarde, tanba fornesedór material ba konstrusaunUKL laiha kapasidade finanseira.
“Ha’u-nia observasaun iha terrenu ba Uma Kbi’it Laek to’o agora seidauk remata tanba fornesedór laiha kapasidade finanseira atu fornese matérial, tamba ne’e iha tinan kotuk ha’u tuun ba baze ema halo keixa bar-barak, ema husu semente maka fornesedór foin lori saku sanulu ba, loloos ne’e labele, fornesedór ne’e tenke hatene no kontrola maka’as, atu nune’e materiál mak laiha, nia stok kedas atu nune’e prosesu uma ne’e lalais,” Hateten Administradór Francisco ba jornalista sira iha servisu fatin, Kinta (24/02).
Autoriedade Covalima ne’e afirma, fornesedór la’ós osan mak laiha, maibe laiha kapasidade ba finanseira hodi prezudika ba dezenvolvimentu UKL.
“Signifika la’os osan mak laiha, maibe fornesedór ne’e mak laiha kapasidade finanseira, pelumenus fornesedór ne’e iha koñesimentu ba finanseira, tanba la’o tarde hodi, prezudika ona dezenvolvimentu ba UKL ne’e. Ne’ebé ba oin ha’u sei bolu Diretór Programa Nasionál Dezenvolvimentu Suku (PNDS) munisípiu Covalima nian ho pontu fokál sira, atu nune’e halo selesaun ba kompañia ne’ebé atu sai fornesedór ne’e tenke print out, konta bankária, se konta bankária laiha, ita lalika fó, se lae sira ba tabele fali loja sira, se loja sira seidauk halo pagamentu, entaun buat hotu la’o tarde,” Nia informa.
Entertantu administradór ne’e komenta, loloos UKL ba faze dahuluk iha 2021 ne’e finaliza ona iha dezembru tinan kotuk, maibé realidade iha suku Lour, postu Zumalai mak foin inagura, restante seidauk entaun husi ne’e hatudu momos katak UKL iha Covalima tarde tebes.(*)
