Tempotimor (Covalima)-kuarta-feira (30/03/2022) maizumenus tuku 03 madrugada ema deskoñesidu haraun vidru Eskola Bázika Filiál (EBF) nú. 1 no 2 We-Matan.
Haree ba akontesimentus ne’e, koordenadór EBF nú. 1 no 2 We-Matan, Fernando Monis, sente triste tanba ema deskoñesidu harahun vidru eskola nian.
“Vidru ne’ebé ema deskoñesidu harahun horikalan tuku 3 madrugada, komu profesora mak hela besik iha ne’e entaun nia la konsege mai, maibé nia haree husi dook de’it katak, ema deskoñesidu harahun duni vidru rua eskola nian ne’e, maibé ho akontese ne’e iha kalan boot, ita labele hatene ema, tuir informasaun ne’ebé profesora ne’e relata mai ha’u,” dehan Koordenadór EBF ne’e ba jornalista sira iha knar fatin, Kuarta (30/03).
Koordenadór ne’e afirma, hafoin haree vidru rua eskola nian rahun, ema deskoñesidu ne’e mós hakerek liafuan (tolok) iha eskritóriu eskola nia oin hodi trata diretór ho adjuntu inklui koordenadór EBF.
Durante ne’e eskola refere la halo problema ho ema se de’it tantu joven ka komunidade ne’ebé hela besik iha área eskola, maibé estudante balun mak durante tinan rua ka tolu lapasa, entaun deskonfia sira mak hakerek.
“Ami husi primeiru no segundu siklu laiha problema ho joven ka labarik eskola oan sira, maibé husi sira terseiru siklu ne’e labarik sira balu la pasa tinan 2 balu to’o tinan 3 tan de’it badiu la tama eskola valór laiha, entaun la pasa iha ezame, keta halo sira ne’e mak hanoin at mai eskola, maibé ida ne’e ita lahatene tanba la haree ho matan,” Nia dehan.
Hahalok ema deskoñesidu nian ne’e husi parte eskola hato’o ona ba Ofisiál Polísia Suku (OPS), xefe suku no parte seguransa hodi bele mai haree ho matan katak, eskola ida ne’e ema deskoñesidu mak harahun vidru eskola nian.
Nia husu ba Ministériu Edukasaun Juventude no Desportu (MEJD) atu tau atensaun, nune’e bele halo rekrutamentu ba pesoál seguransa hodi tau matan, nune’e ba futuru labele akontese tan kazu hanesan. Tanba dadaun ne’e pesoál seguransa na’in ida, maibé seguransa iha tempu loron de’it.
“Seguransa na’in ida de’it husi terseiru siklu nian, maibé tanba nia tauk kalan seguransa, nia la toba iha eskola, eskola sai nia save hotu odamatan nia fila ba uma, dadersan mak foin mai loke fali odamatan eskola nian, entaun kalan laiha seguransa,” dehan Nia.
Entertantu dadaun ne’e estudante sira iha EBF We-Matan hamutuk 416 ne’ebé kompostu husi primeiru, segundu siklu no terseiru síkulu.(*)
