Tempotimor (Covalima)-Ohin, Grupu Arte Marsiais (GAM) no Grupu Arte Rituais (GAR) iha munisípiu Covalima halo ona juramentu katak munisípiu Covalima sei iha paz no dame.
Ba jornalista sira Prezidente Komisaun Reguladora Arte Marsiais (KRAM), Octávio da Conceição katak, KRAM hamutuk ho Sekretáriu Estadu Juventude no Desportu (SEJD) fó konfiansa ba lider arte marsiais no rituais atu kontrola membru sira.
“KRAM ho SEJD fó konfiansa ba lideransa organizasaun sira katak, sira rasik mak kontrola sir-nia membru, atu labele involve-aan iha asaun violébsia sira ne’ebé perturba ordem pública sira,” Dehan Octávio ba jornalista sira hafoin partisipa juramentu GAM no GAR ne’ebé hala’o iha Igreja Avê Maria Suai, Sábadu (30/04).
Nia hatutan, membru arte marsiais ne’ebé la kumpri regra ne’ebé introdúz iha matadalan, makasegunda diretiva sei hetan sansaun.
“Kuandu membru arte marsias mak la kumpri regras ne’ebé introdúz ona iha matadalan segundu diretiva nian sei aplika lei númeru 5/2017 no agora dadauk Komisaun Reguladora Arte Marsiais (KRAM) hamutuk ho SEJD halo hela pakote lejislasaun atu fó sansaun ba membru arte marsiais sira ne’ebé komete problema infrasaun,” Octávio hatutan.
Membru arte marsiais ne’ebé komete violénsia sira sei hetan sansaun hanesan xamada atensaun, multa koimas no suspensaun.
“Iha modelu sansaun lubuk ida mak ami hatur iha matadalan, hanesan sansaun fó xamada atensaun, multa koimas ba individu ne’ebé komete irregularidade no koimas ne’e rasik komforme ba grau violasaun ne’ebé nia komete no nia kuantidade ki’ik liu mak $25.00 no kuantidade koimas boot liu bele to’o $5.000, not sansaun seluk mak fó suspensaun ho durasaun tempu naruk, enkuantu halo nafatin atividade mak bele halo suspensaun ba kampu ka ranting ne’ebé la kumpri regra sira ne’e,” Nia tenik.
Entretantu asaun dame malu entre grupu arte marsiais no arte rituais iha munisípiu Covalima ne’e hala’o iha resintu Igreja Avê Maria Suai.(*)
