Tempotimor (Covalima)-Molok selebra aniversáriu loron restaurasaun independensia ba dala XX (20), funsionáriu hamutuk ho juventude no estudante sira hala’o limpeza jerál haleu iha Suai Vila, Munisípiu Covalima.
Diretór ESGP Suai, Francelino Freitas, hatete, tenke kontribui asaun konkreta ruma hanesan limpeza jerál hodi selebra loron restaurasaun independénsia.
“Ekipa kontribuitór ba serimonia 20 de maio ba dala 20 mai husi organizasaun oi-oin hanesan, UNPAZ , CNJTL, ESGP, ETV Cristal, AJS no mós seluk tán, ne’ebé hamos lixu iha área Suai vila, molok hakat ba komemorasaun loron restaurasaun independénsia 20 de Maio,” dehan nia iha Auto Estrada, kurta (18/05).
Nune’e, Reprezentante Juventude Munisípiu Covalima, Barnabe Ferreira sente kontente, tanba molok selebra loron restaurasaun independénsia iha Munisipiu Covalima, Juventude no Estudante sira iha insiativa ho voluntáriu hamos estrada ibun iha kapitál munisípiu.
“Ohin ami hamutuk halo limpeza hodi prepra ba loron restaurasaun 20 de maio,” nia informa
Iha sorin seluk Reprezentante Estudante Universidade UNPAZ, Ramo Covalima mós sente orgulhu ho servisu hamutuk hodi halo limpeza iha área Suai Villa.
“Sente kontenti tebes, tanba servisu hamutuk ho Eskola sira hotu no funsionáriu sira hodi hala’o limpeza hodi prepra ba selebrasaun loron restaurasaun independénsia,” nia espresa. (*)
Selebra 20 Maiu, Funsionáriu ho Estudante Limpeza Jerál iha Suai Vila
