Tempotimor (Covalima)-Segunda-feira (16/05/2022) ohin Ekipa Kontributór ba atividade komemorasaun loron Restaurasaun Independénsia ba dala-XX ne’ebé monu iha 20 de maiu, Maka Kontributór ne’e apoiu nesesidade báziku ba difisiénte sira iha suku Lalawa.
Tuir xefe Ekipa Kontributór, Silvestre Ferreira katak, objetivu husi apoiu hahan báziku ne’e atu refleta katak, ita hotu presiza fó liman ba malu.
“Molok ne’e ami-nia ekipa identifíka ba familia kbi’it laek sira inklui maluk difisiénte sira, entaun ohin mai apoiu ba sira tuir buat ne’ebé ami tau hamutuk, hanesan osan, fos inklui supermi ba sira ne’ebé la hetan rendimentu lor-loron,” Xefe ekipa ne’e dehan ba jornalista sira iha Lalawa, Segunda (16/05).
Nia hatutan, atividade tulun malu ne’e la’ós to’o iha ne’e de’it, maibé sei kontinua hodi halibur ema hothotu.
“Ekipa Kontributór ne’e lapara iha ne’e, sei kontinua lao ho komitmentu ida katak, sei halibur malu bebeik, sei tau hamutuk forsa no rekursu, se mak laiha kbiit hodi hetan rendimentu, ami voluntariumente hatama nia hodi hola parte iha atividades ne’e, ami la’o neneik mais la’o ba bebeik,” Nia komenta.
Iha sorin seluk xefe aldeia Ai-oan, suku Lalawa, Manuel Amaral apresia ba ekipa kontributór, tamba apoiu ona nia komunidade inklui maluk defisiente na’in neen.
“Ha’u-nia sentimentu orgullu no agradese tebes, tamba ekipa ne’e mai halo ona karidade ba ema kbi’it laek no difisiénte na’in neen, iha ha’u-nia aldeia ne’e,” Manuel ko’alia ho haksolok.
Enkuantu reprezentante familia uulnerável, Milenia Moniz Cardoso agradese ba ekipa ne’ebé ho laran luak apoiu ona familia sira.
“Ami hato’o agradese wa’in tebes ba sira, tanba sira nia esforsu servisu hamutuk ami bele hetan aihan hirak ne’e,” Nia dehan.(*)
