Tempotimor (Covalima)-Organizsaun internasional World Vision iha munisípiu Covalima fó apoiu umanitáriu ba familia kbi’it laek, idozu no difisiénte sira hamutuk uma-ka’in 230 iha postu administrativu Maucatar, Zumalai no Fatululik, munisípiu Covalima.
Iha atividade distribuisaun nesesidadé báziku ne’e, Administradór munisípiu Covalima Fransisco de Andrade katak, apoiu sira ne’e loloos ba vítima dezastre naturais nian, maibé tanba vítima sira hetan hotu ona, entaun kontinua fali ba familia kbi’it laek, idozu no difisiénsia sira.
“Loloos ne’e apoiu refere ajuda mak sira ne’ebé vítima ba dezatre naturais sira, maibé ba dadaun ne’e apoiu kuaze remata ona iha munisípiu Covalima, tanba ne’e mak husu World Vision sira, atu sasan bázika ne’ebé sei iha ajuda ba maluk sira ne’ebé kbi’it laiha tebes no ba sira ne’ebé defisiénte sira,” dehan Administradór Fransisco ba www.tempotimor.com iha nia knaar fatin, Ohin (1/06)
Iha okaziaun ne’e menejér servisu World Vision Covalima, João Moniz dehan, apoiu umanitáriu ne’e ajuda liu ba famillia vulneravél no defisiénsia sira.
“Apoiu ida ne’e husi Star Fan ne’ebé servisu hamutuk ho World Vision hodi apoiu ba postu administrativu Fatumea, Fatululik, Maucatar no Zumalai. Loloos ida ne’e ajuda ba vítima inundasaun nian ne’ebé World Vision koordenba servisu hamutuk ho autoriedade munisípiu, maibé vítima sira hetan hotu ona, entaun sasan ne’ebé sei iha apoiu fali ba familia vulneravél sira inklui maluk difisiente sira,” dehan Nia.
Iha momentu hanesan Administradór Postu Fatumea, Filomino Barros lori povu Fatumea nian naran agradese ba apoiu ne’ebé mai husi World Vision ne’ebé hili ona familia 65 iha postu Fatumea hodi benefísia ba apoiu ne’e.
“Agredese tebes ba ita-nia organizasaun la’ós governu sira hanesan World Vision ne’ebé ohin hamutuk ho administradór munisípiu Covalima apoiu ona ha’u-nia komunidade kbi’it laek no defisiente sira hamutuk uma-ka’in 65 iha postu administrativu Fatumea,” hateten nia.
Entertantu apoiu ne’ebé World Vision oferese ba familia uma-ka’in 65 iha postu Fatululik, uma-ka’in 50 iha postu Maucatar no familia 115 iha postu administrativu Zumalai.(*)
