Tempotimor (Covalima)-Ministériu Agrikultura no Peskas (MAP) Liuhusi Diresaun Jeral Agrikultura no Hortikultura (DJAH) kolleta hare Nakroma no hare metan hamutuk hektares 80, ne’ebé utiliza adubus orgániku iha área irigrasaun Webaba, Suku Raimea, Postu Administrativu Zumalai, Munisipiu Covalima.
Tuir Ministru Agrikultura no Peskas, Pedro dos Reis katak, hare iha Zumalai kuaze hektares 500, maibé tanba demora liu, entaun kolleta hektares 80 de’it.
“Lolos ne’e hare iha Zumalai ne’e hektares 700, maibé demora, entaun ita kolleta hektares 80 de’it ne’ebé uza pob nasa no uza adubu orgániku no sai ezemplu ba inan-aman sira. Neneik ba neneik inan-aman agrikultór sira tenke hatoman aan uza pob nassa no adubus orgánika,” dehan Ministru Pedro ba jornalista sira iha natar Webaba, hafoin halo kolleta ba haree refere, Sesta (18/06).
Governante ne’e promete, ba oin governu labele gasta osan ba rai liur, tanba Timor-Leste nia fos iha rai laran mos bele garantia ona, bainhira servisu hamutuk.
“Ita-nia governu tau osan sosa fos rai atu garantia ita nia aihan iha rai laran, duke ita-nia governu tau osan hola fos iha nasaun seluk, signifika ita-nia agrikultór sira iha rai seluk, maibé ita-nia rai bokur barak, tanba ida ne’e mak MAP ho nia diresaun sira iha munisípiu no autoridade lokál sira halo aprosimasaun no ita tenki aproveita ita-nia rai bokur sira no komunika malu kuda dadaun, ita-nia governu tau osan ne’e lábele sai ba liur, maibé fila fali mai ita,” Pedro tenik.
Iha fatin hanesan xefe hrupu Aibalu, Augusto Abel Da Silva orgullu ho prezensa PAM ho ekipa ne’ebé kolleta ona haree grupu Aibalu nian.
“Ami kontenti tebes ho MAP no ekipa tomak ne’ebé ohin bele mai haree direita rezultadu husi ami grupu Aibalu nian durante ne’e, signifika servisu to’o hetan hetan duni rezultadu,” katak Augusto.
Entertantu kolleta hare ne’e partisipa husi Enbaixadór Japaun, embaixadór Brazil no embaixadór Indonesia, World Food Programa WFP (WFP) nomós autoriedade lokál sira inklui komunidaade postu Zumalai.(*)
