Tempotimor (Covalima)-Organizasaun non govermentais (ONG) Centru Comunidade Covalima (CCC) halo dezinfesaun ba eskuadra Polísia Nasionál Timor-Leste (PNTL) munisípiu Covalima no Tribunál Distritál Suai (TDS) hodi prevene moras pandemia Covid-19 iha munisípiu Covalima.
Tuir Koordenadór Centru Comunidade Covalima (CCC), Januário de Fátima katak, objetivu halo dezinfekta ba fatin públiku sira tanba númeru positivu Covid-19 sa’e maka’as, Tanba ne’e CCC iha inisiativa hodi ajuda dezinfekta.
“Atividade dezinfekta ne’e realiza tanba ONG Centro Comunidade Covalima mós hola parte iha Ekipa Taks Force no servisu hamutuk ho Servisu Saúde Munisípiu Covalima (SSMC), tanba ne’e ami mai dezinfekta fatin públiku sira hanesan eskuadra PNTL munisípiu Covalima, Igreja Avé Maria Suai, Prizaun nomós eskola sira iha munisípiu Covalima,” hateten Januário ba www.tempotimor.com iha eskuadra PNTL Covalima. Kinta (17/06).
Koordenadór CCC ne’e dehan, fasilidade desinfesaun ne’e hetan apoiu husi Servisu Saúde Munisípiu Covalima hanesan Ekipamentus Protesaun Pessoal (EPP), Máskara no roupa Protesaun no Reben matan.
“Fasilidade ne’ebé apoiu husi sentru saúde mak PPE 50, máskara 400, Oklu 10 no luvas 400 hodi apoiu sira-nia servisu, tanba dadaun ne’e ekipa saúde fokus liu ba vasinasaun,” Dehan nia.
Ba kestaun atividade dezinfesaun ne’e, www.tempotimor.com tenta komfirma ho komandante PNTL munisípiu Covalima, Superintendente Polísia António Maria de Sá, maibé nia parte okupadu hela ho servisu.(*)
