Tempotimor (Covalima)-Kampaña Eleitorál nu’udar aktu demokrátiku ida ne’ebé kada tinan lima kandidatura Prezidente Repúblika (PR) no partidu polítiku sira buka votus iha baze maibé realidade hatudu estudante hamutuk 778 iha Eskola Sekundária Jerál Públika (ESGP) Suai sai vítima ba kandidatura sira, tanba halo kampaña besik aradores eskola.
Tuir Koordenadór ESGP Suai ba turnu lokraik, Rui Lemos katak, durante kampaña eleisaun prezidensiál iha munisípiu Covalima fo impaktu tebes ba estudante 778 ne’ebé hala’o aprendizagem besik Kampu Ladi.
“Fatin kampaña ne’ebé lokaliza iha kampu ladi, Eskola EBC Ladi inklui ESGP Suai tornu lokraik lakonsege eskola ho di’ak, tanba ami haree katak, loron rua no tolu iha ne’e fó impaktu tebtebes ba ami-nia prosesu aprendisajem, Tamba influénsia husi lideransa sira ko’alia ho lian ne’ebé maka’as i depois eskola besik kedas kampu kampaña ne’e ninian, tanba ne’e difikulta tebes ba ami, atu hala’o aprendisajem,” dehan Koordenadór ESGP Suai, Rui Lemos ba www.tempotimor.com iha knar fatin, Tersa (08/03).
Koordenadór ne’e afirma, maske ruidu maka’as iha tempu aprendisajem, maibé orientasaun husi nasionál katak profesór kontinua hanorin estudante sira iha aula laran, maske kampaña kandidatura nian barulla.
“Instrusaun ka orientasaun ne’ebé husi leten ba ami profesór no estudante tenki mantein iha eskola ka aula ho pasiénsia hodi hasoru situsaun ne’e, ami profesór sira esplika ladi’ak, ne’ebé ami buka meius oinsa ami kopia matéria de’it iha kuadru ba estudante sira hodi estuda iha uma, ne’ebé loron kampaña ne’e remata mak ami bele esplika ba sira,” Katak nia
Manorin ne’e sujere ba lideransa sira atu idenfika fatin ne’ebé seguru ka di’ak ba kampaña ba eleisaun parlamentar iha futuru.
“Ami sujere ba lideransa sira, se bele kampaña parlamentar tuir mai identifika fatin kampaña ne’ebé di’ak, nune’e labele difikulta ba estudante sira, tanba durante ne’e ami hala’o aprendizajem ladi’ak, estudante sira halimar de’it,” Nia dehan.
Iha sorin seluk reprezentante estudante désimu primeiru anu ESGP Suai, Aurélia de Araújo sente triste tebes, tamba durante loron tolu ona mak hala’o aprendizajem ho barullu.
“Ami triste tebes ho kampaña ne’e, tanba ami-nia mestri sira tama aula hakerek fó ami de’it, la esplika ba ami, ne’ebé ami husu ba parte relevante atu haree kestaun ne’e, durante loron tolu no parese aban ba oin ne’e ami mai hanesan ne’e de’it, la halo buat ida, tanba sira hakilar ho lian maka’as, profesór no profesora labele hanorin ami,” Nia Hakotu.(*)
