Tempotimor (Covalima)-Tuir Diretór Komisaun Nasionál ba Eleisaun (CNE) munisípiu Covalima, Hermenegildo de Sena katak, husi observasaun CNE iha terrenu nota katak, labarik ho otas ki’ik porsentu 45% mak partisipa iha kampaña.
“Ami CNE nian observasaun haree katak, labarik barak mak partisipa iha kampaña Eleisaun Prezidensiál (ElPres) iha tinan ne’e no kuaze 45% labarik ne’ebé kartaun eleitoral seidauk iha mak barak liu involve iha kampaña eleitorál,” dehan Diretór CNE Covalima ba jornalista sira, Tersa (08/03).
Kampaña eleitorál ba kandidatura Prezidente Repúblika (PR) ba periodu 2022 to’o 2027 husi loron dahuluk to’o loron daneen iha munisípiu Covalima, maioria mak labarik sira ne’ebé seidauk bele ezerse direitu iha loron 19 marsu, tanba tinan seidauk to’o hodi hetan kartaun eleitorál.
“Hahú husi kandidatu ho númeru sorteiu 2 nian mai to’o agora kandidatu ho número sorteiu 6, labarik sira tuir Aman-Inan no tiun sira hodi partisipa kampaña rame-rame, maibé tuir loloos ne’e labele, tanba sira seidauk iha kartaun eleitorál, sira-nia inan-aman hatene hela, maibé finje lahatene, ne’ebé CNE toma nota, depois anota sira ne’e ba ami-nia superiór, depois superiór hato’o ba komisáriu direitu labarik nian hodi haree kestaun ne’e,” Nia hakotu.(*)
