STAE Covalima Sei Distribui Materiál Eleisaun ba Sentru Votasaun

Funsionariu STAE halo hela verifikasaun ba buletim de votus ne'ebe to'o ona iha Covalima, Sabadu (12/03). Foto Suplay

Tempotimor (Covalima)-Sekretariadu Tékniku Administrasaun Eleitorál (STAE) Covalima simu material eleisaun nian, mak semana ne’e sei distribui ba sentru votasaun sira ne’ebé estabelese ona iha postu administrative, munisípiu Covalima.

“STAE simu ona materiál sensitivu ho non-sensitivu iha horseik lokraik maizumenus tuku 18:00 otl, entaun ita halo pakote materiál ne’ebé atu distribui ba sentru votasaun iha postu administrativu hitu iha Covalima,” dehan Diretór STAE Covalima, Francisco Gusmão ba jornalista sira, ohin (12/03).

Read More

Materiál ne’ebé STAE nasionál transporta mai Covalima mak buletin de votu ho livru, urna 240 no lista votante sidadaun sira nian.

Hafoin simu materiál eleisaun ne’e brigada STAE hamutuk ho ofisiál Komisaun Nasionál Eleisaun (CNE) hahú halo verifika ba buletin de votu ne’ebé sei termina iha loron 17 semana oin molok iha loron 18 distribui materiál refere ba sentru votasaun sira.

“Atu transporta materiál hirak ne’e, STAE Covalima identifika transporte 40 sei transporta materiál sira ba sentru votasaun no bainhira transporte la sufisiente mak STAE sei aluga transporte bazeia ba nesesidade STAE nian,” katak Nia.

Entretantu tuir dadus husi STAE katak, eleitór ne’ebé atu ezerse direitu iha loron 19 fulan ne’e hamutuk rihun 47,807 ne’ebé kompostu husi mane rihun 24.446 no feto rihun 23.361. nune’e elitór hirak ne’e sei ezerse direitu iha sentru votasaun hamutuk 80 no estasaun votasaun hamutuk 92.(*)

Related posts