Tempotimor (Covalima)-Sekretariu Estadu Juventude no Desportu (SEJD) liuhusi unidade sekreráriu entrega termu servisu animadór ba autoriedade munisípiu Covalima.
Tuir Inspetór Unidade SEJD, Saturnino Sarmento katak, bazeia ba programa husi Sekretáriu Estadu Juventude no Desportu (SEJD), Abrão Saldanha kontinuasaun servisu no apresenta ba munisípiu Sira.
“Iha tinan kotuk ami halo rekrutmentu ba joven sira iha teritóriu tomak hamutuk 900-resin, ne’ebé ohin iha Covalima iha ema na’in-14. Kada postu ema na’in rua no balun sei iha prosesu nia laran tanba dokumentus seidauk prienxe kritéria SEJD, ne’ebé hodi aprezenta ba Administradór Munisípiu Covalima,” dehan Inspetór Saturnino ba jornalista sira iha Salaun Administrasaun Munisípiu Covalima, Sesta (25/03).
Inspetor ne’e afirma, tuir planu SEJD iha tinan 2022 sei kontinua entrega karta termu servisu unidade postu ba administrasaun munisípiu Covalima, hodi halo monitorizasaun ba animadór sira tanba kada postu administrativu dezloka ona animadór na’in rua, nune’e administrasaun munisípiu bele hatene sira-nia servisu iha postu no munisípiu.
Animadór na’in rua ne’e, ida sai animadór ba juventude no ida seluk sai animadór desportu. Enkuantu animadór ba juventude ne’e sei halo mitorizasaun no animasaun ba grupu alvu sira hanesan grupu empreendedorizmu no oinsa halo relatóriu ba osan ne’ebé grupu sira iha, no animadór desportu responsável ba desportu komunitáriu iha postu no edukasaun desportu eskolár sira.
Iha fatin hanesan reprezentante Administradór Munisípiu Covalima, Jacinto dos Santos apresia ba Sekretáriu Estadu Juventude no Desportu (SEJD) nia programa tanba rekruta ona jovensira iha nível munisípiu.
“Sente orgullu no apresia ba progrma SEJD ne’ebé rekruta ona unidade serbisu kada postu ho ema na’in rua iha municípiu Covalima no atu fó haoin mós ba unidade serbisu postu atubele hala’o sira-nia kna’ar ho responsabilidade iha postu refere,” nia dehan.(*)
