Trimestre Dahuluk 2022, Uma-Ka’in 38 Sai Vítima ba Dezastre Naturais

Diretor Servisu Munisipal Jestaun Risku Dezastre Natural (KJRDN) Quintino da Costa ko'alia ho jornalista sira kona-ba dezastre naturais, Kinta (25/03). Foto Tempo Timor

Tempotimor (Covalima)-Liga ba relatóriu husi Servisu Munisipál Jestaun Risku Dezastre Naturais (SMJRDN) Munisípiu Covalima katak, hahú fulan janeiru to’o marsu tinan ne’e, uma-ka’in 38 iha munisípiu Covalima sai vítima ba dezastre naturais.

“Hahú fulan janeiru to’o marsu tinan ne’e, servisu munisípal risku dezastre naturais rejista ona uma-ka’in 38 mak vítima ba dezastre naturais,” dehan Diretór SMJRDN Covalima, Quintino da Costa ba jornalista iha salaun Servisu Solidariedade Sosiál (SSS), suku Suailoro, Sesta (25/03).

Read More

Uma-ka’in 38 ne’ebé sai vítima ba dezastre naturais ne’e tanba hetan sobu husi anin, maibé husi parte governu lokál hamutuk ho parseiru sira halo kedas intervensaun emerjénsia hodi apoiu ba vítimasira.

Enkuantu ekipa SMRDN mós halo ona idetifikasaun ba fatin hirak ne’ebé mosu risku ba dezastre naturais hanesan, iha suku Beco, Aldeia Bonuk, be’ebé pertense ba postu administrativu Suai Vila, Suku Ogues, postu administrativu Maucatar inklui postu administrativu seluk.

Alende ne’e nia mós fó hanoin ba komunidade sira, nafatin atensaun bainhira tempu udan maka’as no anin boot, prioridade primeiru salva aan no dokumentu importante sira. Tanba bazea ba esperiénsia iha tinan 2013 ekipa SMRDN evakua komunidade sira Suai Vila ba EBC Suailoro, komunidade husi suku Camanasa halo evakuasaun ba EBC Ladi no tinan ne’e ekipa mós identifika tan sentru evakuasaun permanente iha eskola sekundáiu jerál públiku Seran Kotek.

Liga ba kestaun ne’e SMRDN halibur setorais ka parseiru sira ne’ebé servisu ba dezastre iha munisípiu hodi harmoniza Komisaun Jestaun Dezastre Munisípiu Covalima (KJDMC) nian.

“Enkontru ida ohin ne’e atu harmoniza di’ak liután ekipa (KJRDMC) iha munisípiu Covalima atu nune’e ema hothotu hola parte iha komisaun ida ne’e, intervensaun iha situsaun emerjénsia ba to’o evakuasaun no ba situasaun ne’ebé atu mosu desastre iha Covalima,” nia dehan.

Iha fatin hanesan Sekretáriu Administrasaum Munisípiu Covalima, Francisco de Jesus Alves husu ba ekipa dezastre naturais atu servisu hamutuk hodi responde komunidade ne’ebé hetan estragus husi mota ka bee.

“Husu ekipa dezastre natural munisípiu covalima kontinua servisu hamutuk hodi haree ita-nia komunidade sira iha ne’e, tanba durante há’u observa katak, servisu diak tebes, komunidade hasoru buat ruma iha terrenu hanesan anin loke uma, bee sa’e ka mota lori ema, ita-boot sira prezensa hodi apoiu emerjénsia kedas, ne’ebé agrdese tebes ba ita-boot sira nia servisu,” katak Francisco.(*)

Related posts