Tempotimor (Covalima)-Dezastre Naturais ne’ebé akontese iha loron 17 Fevereiru 2022 ne’e halo vítima José de Araújo triste tanba liu ona fulan ida, maibé parte governu seidauk hetan apoiu ruma husi governu.
“Akontesimentu ne’e iha 17 Fevreiru 2022 akontese anin bo’ot estraga uma ne’e to’o agora seidauk hetan ajuda ruma, ne’ebé hanesan komunidade sente triste tebes ho parte balun nia servisu iha munisípiu, ami akompaña iha televizaun no média sira seluk wainhira akontese bee sa’e ka akontese buat seluk hodi estragus komunidade sasan ka uma ne’e sira ajuda emerjénsia kedas, maibé ami mak iha área rurál de’it araska tebes atu hetan ajuda ruma husi sira,” José espresa Lia Hiram ne’e iha Nia rezidénsia Lactose, Sábadu (26/03).
Ho situasaun ne’e, vítima José de Araújo husu ba parte relevante atu apoiu matérial uma nian hanesan kalen, nune’e hodi taka hikas Uma ne’ebé anin sobu ona.
“Se bele apoiu netik kalen ruma, tanba anin huu sai hotu ona kalan uma nian, tanba ami hato’o ona ba xefe suku Lactos no Ofisial Polísia Suku (OPS) iha ami-nia suku ne’e, sira mós mai haree kedas, maibé to’o agora laiha responde ruma,” tenik vítima José.
To’o notísia ne’e públika www.tempotimor.com seidauk halo konfirmasaun ho parte Servisu Solidariedade Soaiál no Inkluzaun (SSSI) no Servisu Protesaun Sivíl (EPS) Covalima, tanba loron feriadu.(*)
