Tinan 22, Komandante Basílio: “Servi Povu Labele Sura Kolen”

Tempotimor (Covalima)-Polísia Nasionál Timor-Leste (PNTL) ne’ebé eziste ona ba dala-22 iha Timor-Leste, mak Komandante PNTL Munisípiu Covalima, Superintendente Polísia Basílio de Jesus husu ba membru sira atu labele sura kolen bainhira servi povu.

Komandante ne’e dehan, membru sira presiza servi povu ho profesionál, liuhusi asaun atendementu sidadaun iha baze no PNTL prontu hametin lei no ordem ho imparsiál hodi prevene krime iha estadu direitu demokrátiku ne’e

Read More

“Fó hanoin ba ita-hotu ho idade ne’ebé aumenta iha nasaun ida ne’e, obriga ita hakarak lakohi ita tenke profesionál liuhusi asaun atendementu iha baze, nakonu ho sentidu pasensia no amizade”, Komandante Basílio dehan ba jornalista sira horseik, (27/03).

Polísia la’ós servi inimigu, maibé servi amigu. inimigu ho sidadaun sira-nia hahalok bainhira sira halo asaun krime, tanba polísia ezekuta lei no ordem.

Polísia la kria separasaun entre komunidade, joven, estudante ho polísia, maibé polísia kria parseiru di’ak, amizade ho institusaun estadu ne’ebé eziste iha Covalima no servi sidadaun nakonu ho diginidade.

“Servi povu labele sukat ita-nia kolen, kalan no loron, kualker tempu, ita polísia servi sira iha fatin ne’ebé ita hela ba, mezmu la’ós hosi oras servisu, ha’u repete, ita-boot sira, tuir konseitu polísia, di’ak liu polísia mate na’in-10 duké joven no sidadaun ida mate, ne’e ejize ita atu salva sidadaun iha kualker situasaun, defende sidadaun livre husi kualker ameasa,” Nia informa.

Komandante ne’e afirma, tinan 22 tempu ona atu profesionál, sai liman kroak hodi defende povu, la’ós liman kroat hodi fó ameasa ho tendénsia baku-tebe no halo mate. Sira ne’e la’ós ona tempu.

Tanba tuir konstituisaun RDTL iha artigu 147, polísia no forsa seguransa sira tenke defende legalidade demokrátiku no garante sidadaun sira-nia seguransa internu, maibé sira labele iha partidu polítiku. Prevensaun kriminál tenke hala’o ho respeitu ba direitus umanus.(*)

Related posts