Tempotimor (Covalima)-Tuir Field Officer Raes Hadomi Timor Oan (RHTO) munisípiu Covalima, Rosito Amaral katak, dadus Ema ho Difisiénsia (EhD) ne’ebé RHTO rejistu iha Covalima hamutuk 304.
“Ami rejistu ba maluk defisiénte iha Covalima hamutuk 304, husi tinan 2021 to’o agora ami mós kontinua buka maluk difisiente ne’ebé seidauk rejistu, ba maluk sira ne’ebé hetan ema ho problema ain, liman no problema sel-seluk bele hato’o ba ami, nune’e ami hasoru hodi halo intervista, depois sira-nia naran ne’e ami pasa ba Ministériu Solidariedade Sosiál no Inkluzaun (MSSI) hodi hetan apoiu ruma,” dehan Rosito ba www.tempotimor.com via telefone, Tersa (29/03).
Nia hatutan, husi totál ema ho difisiénsia ne’ebé RHTO rejista ne’e, na’in haat hetan bolsu estudu no na’in 15 seluk hein hela resposta husi ministériu relevante kona-ba kadeira roda.
“Na’in haat mak hetan bolsu estudu hodi eskola iha Suai iha nível pre-sekundária, no sira seluk ne’ebé labele eskola ami apoiu aihan ba sira, enkuantu na’in 15 seluk ne’ebé problema iha ain, ami rejistu ona hodi hetan kadeira roda, ne’ebé agora lista ba sira atu hetan kadeira ne’e tempu badak sei intrega ba sira,” katak Nia.
Enkuantu, kona-ba apoiu ba sira ne’ebé hetan bolsu estudu RHTO fasilta sira lapizeira, kadernu, sapatu hodi hakman inan-aman no katak fulan neen RHTO apoiu orsamentu dollar amerikanu $,75.00 ba kada pesoa.(*)
