Tempotimor (Covalima)-Tersa-feira (29/03/2022) ne’e, Ekipa Konsellu Nasionál ba Seguransa, Soberánia Ai-han no Nutrisaun iha Timor Leste (KONSSANTIL) munisípiu Covalima aprezenta rezultadu servisu trimestre dahuluk nian ba setorais sira.
Tuir Diretór Servisu Munisipál Seguransa Alimentár nu’udar mós sekretáriu KONSSANTIL, Reinaldo Alberto Moniz Coli katak, sorumutu ne’e atu update progresu servisu nian ba autoriedade Covalima tomak.
“Ohin konvida membru KONSSANTIL sira iha Covalima hanesan Obras Públika, Servisu Edukasaun Munisípiu, Bee Timor-Leste, Servisu Saúde Munisípiu no sira seluk tan ne’ebé tutela iha KONSSANTIL, hodi hato’o ami-nia progressu servisu trimestrál ne’ebé ami halo ona, ba setorais sira iha Covalima,” Diretór Reinaldo hateten ba jornalista sira iha salaun administrasaun Covalima.
Iha reuniaun ne’e ekipa KONSSANTIL aprezenta preokupasaun komunidade nian ba setorais sira hodi rezolve kondisaun estrada no bee moos iha Covalima.
“Ohin ami kestiona kona-ba estrada, ne’e knar Obras Públiku nian hodi tau matan ba estrada rurais sira, nune’e komunidade sira bele asesu estrada hodi fa’an produtu lokál, tanba ne’e ami konvida setorais sira hotu nomós Sosiedade sivil hotu hodi halo reuniaun ne’e,” Nia informa.
Alende ne’e Sekretáriu Administrasaun Munisípiu Covalima, Fransisco de Jesus Alves husu ba membru KONSSANTIL sira iha Covalima atu kontinua servisu ho di’ak.
“Atu dehan de’it ba ekipa KONSSANTIL sira iha Munisípiu Covalima nafatin ho servisu ne’ebé hala’o, nune’e bele hatutan komunidade sira-nian preokupasaun ba iha servisu parte relevante,” Nia hakotu.(*)
