Tempotimor (Covalima)-Tersa-feira (12/04/2022) maizumenus tuku 23:00 kalan oras Timor-Leste, mosu inséndiu ida iha suku Suailoro, aldeia Manekin rezulta komunidade Lino de Jesus nia uma no sasan uma laran labele salva inklui osan muntante rihun $4.000-resin.
Liga ho inséndiu ne’e vítima Lino la deskonfia ema ruma maka sunu, maibé deskunfia impaktu husi sirkuitu elétrika.
“Ahi han iha oras 11 kalan, tamba Ami Hader hela aifunan iha sorin, depois halai fali ba sasan uma laran ida mós la salva inklui materiál mebel nian sira nee kuase osan karik liu $3.000, depois sasan ne’ebé folin boot liu mak makina mebel nian tanba $1.800. so sasan ne’ebé salva mak ha’u-nia motor, tamba para iha liur entaun labarik sira mak salva,” hateten Vitima Lino ho matawen ba jornalista sira iha suku Suailoro, Kuarta (13/04).
Realsiona ho situasaun ne’e, Xefe suku Suailoro Martinho Mendonça katak, nia parte halo ona proposta ba Servisu Solidariedade Soaiál (SSS) Covalima hodi hetan apoiu emerjénsia.
“Atu ajuda emerjénsia prontu ona, agora hein husi ne’ebé atu responde buat balu, hanesan sasan ne’ebé ahi han depois ho ninia sasan mebel nian,” katak xefe suku ne’e.
Entertantu iha inséndiu ne’e la rezulta ema kanek no mate tanba bainhira mosu inséndiu ne’e komunidade sira kontaktu kedas bombeirus hodi hamate ahi refere, maibé la konsege salva sasan hotu.(*)
