Deskonfia, SSSI Covalima Halo Promesa Falsu ba Angelita

Difisiente Angelita Barros , Sesta (06/05). Foto Tempo Timor

Tempotimor (Covalima)-Angelita Barros (14) nu’udar feto foinsa’e ida ne’ebé hela iha aldeia Kolo-Ama, Suku Kasabauk Postu Administrativu Tilomar, Munisípiu Covalima ho kondisaun difisiénsia no inosente hela, maibé Ministériu Solidariedade Sosiál no Inkluzaun (MSSI) ne’ebé lidera husi Vise Primeira Ministra (VPM), Armanda Berta dos Santos husik hela promesa faslu ba feto foinsa’e ne’e durante tinan rua ona.

Angelita Barros ne’ebé oan dahaat husi maun-alin na’in hitu no oan doben husi Marcelino Barros (Aman) ho Natercia da Resureição (Inan) ne’e difisiensia iha parte ain no ibun, tanba ne’e durante nia moris halo de’it kominikasaun jestuál ho família.

Read More

“Nia moris mai iha nia inan nia kabun laran lori kedas, ne’ebé nia moris mai ain no liman ne’e kait hotu, ne’ebé kous de’it to’o agora, tempu balun liubá ne’e nia ain no liman komesa di’ak oituan, Nia mesak ba mai, ne’ebé ami mós halo netik servisu, lae ami servisu mós araska loos,” Marcelino ko’alia ho laran susar ba jornalista sira, Sesta (06/05).

Ba situasaun ne’e, Marcelino Barros nu’udar aman ba Angelita Barros informa, kondisaun Angelita nian ne’e moris mai kedas hanesan ne’e, nune’e iha tinan rua liubá Diretór Servisu Solidariedade Sosiál Covalima (SSSC) promete atu apoiu kadeira roda ba Angelita, maibé liu ona tinan rua promessa hela ho mamuk.

Maske promessa ne’e kleur ona seidauk realidade, maibé Marcelino Barros nafatin haklalan ba maker ukun sira inklui Reas Hadomi Timor Oan (RHTO) atu apoiu netik Angelita ho kadeira roda inklui aihan hodi augenta nia moris.

Aman doben ne’e akresenta, bainhira Anjelita halo iha tinan 7, asesu ba edukasaun, maibé iha momentu ne’ebá, tenke husik iha karosa laran depois dudu no lori Angelita ba eskola.

“Nia tinan 7 hakarak tama eskola, entaun há’u lori nia ba eskola, maibé há’u dudu ho gerobak ba mai, ba mai há’u mós sente kolen, entaun ho buat sira ne’e há’u mós sente kolen no para eskola de’it ona,” Katak Nia.

Entretantu, Angelita kompleta ona tinan 14, maibé husi parte autoriedade lokál seidauk foti dadus ruma kona-ba defisiente Angelita.

Enkuantu hafoin vizita ba difisiente Angelita, jornalísta tenta atu halo konfirma ho xefe aldeia Kolo-Ama, xefe suku Kasabauk, inklui RHTO Covalima, maibé infelizmente sira laiha fatin servisu.

Alende ne’e Diretór Servisu Munisipál Solidariedade Sosiál Covalima mós jornalista sira la konsege halo konfirmsaun, tanba okupadu hela ho servisu seluk.(*)

Related posts