Tempotimor (Covalima)-Autoriedade Covalina nu’udar mós komisaun organizadora ba seremonia komemorasaun loron restaurasaun indenpendensia ba dala 19 tinan 2021, hahú halo preparasaun ba programa sira ne’ebé sei realiza iha 20 Maiu.
Tuir Administradór munisípiu Covalima Fransisco de Andrade katak, sorumutu refere atu tau hanoin hamutuk kona-ba atividade sira ne’ebé atu realiza iha Timor-Leste nia restaurasaun Independénsia ba dala XIX.
“Ohin administrasaun munisipiu komvida diretór no diretora sira hotu atu diskute atividade sira ba komemorasaun loron restaurasaun ba dala 19 iha munisipiu Covalima, entaun atividade hamutuk neen mak sei realiza iha serimónia mak hanesan isar bandeira nasional, logístiku, mobilizasaun komunidade, limpeza, seguransa no sekretariadu,” dehan Francisco ba www.tempotimor.com liuhusi nia diskursu iha salaun adminisrasaun Suai, segunda (26/04).
Iha fatin hanesan komandante Polísia Nasionál Timor-Leste (PNTL) Munisípiu Covalima Superintendente Antônio Maria de Sá katak, parte seguransa prontu kopera ho atividade 20 de maiu, maibé nafatin kumpri regras Organizasaun Mundiál ba Saúde (OMS) tanba Covalima seidauk hatene relasiona ho situasaun moras pandemia Covid-19 ne’e.
“Parte seguransa iha opsaun rua, tanba Covalima agora serka sanitária hela iha dia 2 de maiu remata entaun ita bele komemora loron ne’e, ne’ebé espera katak dia 2 de maiu ita-nia serka sanitária remata, entaun Covalima hala’o atividade loron proklamasaun hanesan loron baibain,” hateten nia.
Entertantu estrutura komisaun organizadora ba atividade 20 maiu 2021 nian maka hanesan, administradór munisípiu Covalima Fransisco de Andrade (Konsilleiru), Komandante PNTL munisipiu Covalima Antônio Maria de Sá, Kordenadór Jerál mak Afonsu Nahak, Vice Koordenadór Damião Amaral, sekretariadu jerál Aniceto de J. Amaral, vice sekretariadu Robertu A. Gomes, tezoreira Vitorino Amaral no vice tezoreira mak Elizabeth de Jesus. (*)
