Tempotimor (Covalima)-Hafoin Administradór Munisípiu Covalima Francisco de Andrade hetan pose husi Ministru Administrasaun Estatál (MAE) Miguel Pereira de Carvalho iha edifísiu Ministériu Finansas (MF) Aitarak Laran Dili, iha fulan kotuk, maka ohin Konsellu Veteranu Munisípiu Covalima (KVMC) nian felista no aprezenta ona planu prioridade balun ba Administradór foun ne’e hodi kontinua servisu.
Tuir Sekretáriu Ezekutivu Veteranu Munisípiu Covalima Amaro Amaral, sorumutu ne’e fó felisitasaun ba administradór foun inklui aprezenta mós planu no atividade konsellu veteranu nian iha Covalima.
“Objetivu mai hasoru malu ho Administradór munisipiu Covalima ne’e, mai apresenta konsellu veteranus nia naran inklui apresenta papél konsellu veteranus nian no planu ne’ebé trasa ona ba iha munisípiu, nune’e administrdór bele akompaña no oinsa implementa programa ne’e iha futuru,” dehan Amaro ba www.tempotimor.com iha edifísiu Administrasaun Suai, Tersa (4/5).
Nia afirma, KVMC mós prepra no planu ona oinsa atu tau eroi sira ne’ebé mate ba funu ne’e nia naran iha ponte ka sítiu sira ne’ebé eziste iha munisípiu Covalima.
“Faze primeiru halo identifikasaun ba abrigu sira ne’ebé uluk ita-nia avo no tiun sira kontra invasaun Indonézia iha fatin-fatin, nune’e oinsa mak konsellu veteranus konserva fila fali istória hirak ne’e hodi tau iha planu asaun anuál nian hodi konstroi iha futuru,” Nia esplika.
Iha fatin hanesan, Administradór munisípiu Covalima Fransisco de Andrade mós apresia ba KVMC ne’ebé kontinua servisu maka’as.
“Sira mai atu apresenta sira-nia planu atividades ba futuru nomós aproveita tempu fó parabens ba ha’u, tanba durante ha’u simu knaar hanesan administrador sira seidauk hasoru ho ha’u entaun fó parabéns ba ha’u depoia ko’alia mós kona-ba dezenvolvimentu iha munisípiu Covalima ba futuru,” katak Administradór.
Entertantu KVMC mós identifika ona fatin masakre Halik, Lakirin no seluk tan iha munisípiu Covalima hodi prezerva hikas memória sira ne’e ba jerasaun kontinuadór sira.(*)
