Tempotimor (Covalima)-Komandante Polísia Nasionál Timor-Leste (PNTL) Munisípiu Covalima Superintendente Polísia, António Maria de Sá, agrdese no apresia ba prezensa suai.tempotimor.com iha Covalima, tanba ajuda komunidade hodi hatene situasaun atuál.
Komandante ne’e agradese, hafoin media online www.suai.tempotimor.com halo publikasaun ba notísia ho títulu “Grupu Deskoñesidu Halo Kobransa Ilegál iha Covalima” iha loron (28/4) semana kotuk, tanba ajuda ona komunidade hodi fo atensaun ba situasaun sira ne’e.
“Ita boot sira-nia notísia kona-ba grupu deskoñesidu halo kobransa ilegál iha Covalima ne’e di’ak no fó atensaun ona ba ema, tanba bele fó hanoin ba sidadaun sira labele akontese tan ho kobransa ilegál sira ne’e no issu ninja iha Covalima, tanba foin dadaun akontese issu ninja ne’e nia boot kaer ona iha munisípiu Ainaru iha tinan 2020, Ne’ebe agora laiha ona,” dehan Komandante António ba www.tempotimor.com iha nia knaar fatin Suai, Segunda (3/5).
Nia afirma, maske issu ne’e akontese iha tinan kotuk, maibé husi informasaun ne’e fanun fila falu komunidade sira hodi atensaun liután, maske to’o agora seidauk iha issu sira hanesan ne’e.
“Notisia ne’ebé ita boot sira públika ne’e akontese iha tinan 2020, ba tinan 2021 husi Janeiru to’o Abril parte PNTL munisípiu Covalima seidauk rona issu ruma kona-ba ida ne’e,” dehan nia.
Entertantu komandante PNTL munisípiu Covalima sei servisu hamutuk di’ak liután ho www.tempotimor.com iha futuru, nune’e komandante ne’e bolu no halo interkámbiu durante oras ida resin kona-ba oinsa servisu hamutuk entre PNTL no média oline Tempo Timor iha Covalima.(*)
