Tempotimor (Covalima)-Hafoin kompleta loron 14 iha karantina Suai, ekipa saúde re-integra hikas abitante 12 ba komunidade no familia, tanba kumprimenta ona periodu kuarentena inklui livre husi virus Covid-19.
Tuir Diretór servisu saúde Munisípiu Covalima, Filipe Pereira Lemos, katak, ekipa saúde re-intrega ona ema na’in 12 ba familia, tanba kompleta ona kuarenta loron 14 no livre husi Covid-19.
“Ohin ekipa vizilánsia re-intregra ema na’in 12 husi kuarentena Suai ba sira-nia familia, tanba sira negativu hotu,” dehan Diretór Filipe ba www.tempotimor.com iha nia knaar fatin Suai, Kuarta (5/5).
Nia afirma, abitante na’in 12 ne’ebé fila ona ba komunidade no familia nu’udar kontaktu besik ba pasiente ida seluk ne’ebé antes ne’e detekta iha postu administrativu Fatumea.
“Familia na’in 12 ne’e partisipa hotu funeravel ida iha Fatumea, depois fila ba sira-nia fatin, maibé viziñu sira lakohi simu sira, entaun ami lori mai karantina suai hodi kumpri 14 dias, depois ekipa saúde halo teste swab, hatudu katak hetan negativu hotu, ne’ebé re-intrega ona sira ba familia,” hateten nia.
Entertantu dadaun ne’e iha karantina suai hela abitante na’in ida de’it, maibé kazu pozitivu mak aumenta hikas na’in ida, nune’e pasiente Covid-19 ne’ebé kontinua baixa iha izolamentu Suai hamutuk 17.(*)
