Tempotimor (Covalima)-Iha loron tersa 18 Fulan-maiu tinan 2021 madrugada maizumenus tuku 02:00 oras Timor-Leste mosu inséndiu iha aldeia Matai, suku Matai, postu administrativu Maucatar, Munisípiu Covalima ne’ebé rezulta uma ida ahi han mutuk inklui sasan uma laran la salva.
Tuir vítima ba inséndiu ne’e, Elsa Maria de Jesus katak, akontesimentu ahi han uma kuandu vítima sira toba dukur ona, tanba ne’e vítima sira lahatene ahi husi ne’ebé mak han uma ne’e.
“Horikalan ha’u toba dukur loos ho ha’u-nia oan nurak, derpenti de’it ahi sa’e maka’as han tia didin piku iha sorin, taun ha’u fanun katuas oan, mas labele salva ona sasan uma laran hanesan batar bidon rua, manu fos saka ida, fos rai sanan ida, sasan dapur laran no roupa uma laran ida mós la salva hotu só roupa iha isin lolon de’it,” dehan vítima Elsa ba www.tempotimor.con Tersa (18/5).
Vítima Elsa akresenta, hafoin akontesimentu inséndiu ne’e, ekipa bombeirus munisípiu Covalima ho autoriade lokál mós to’o kedas fatin akontesimentu hodi halo intervensaun, maibé sasan hotu laiha ida mak salva.
Nia komenta, husi parte autoridade lokál sira rekolla ona dadus kona-ba inséndiu ne’e, hodi enkamiña ba Ministériu Solidariedade Sosiál no Inkluzaun (MSSI) nivél munisipál nian hodi hetan apoiu ba vítima refere.
“Ha’u husu nai ulun sira iha suku to’o munisípiu atu ajuda netik ha’u hanesan uma sira ne’e ba ha’u, tanba agora tempu hanesan atu halo uma araska,” hateten nia(*)
