Tempotimor (Covalima)-Komunidade aldeia tolu husi suku Beco postu administrativu Suai hanesan Teda, Tudulpo no Gala seidauk asesu estrada ho di’ak.
Tuir reprezentante komunidade aldeia Tudulpo suku Beco Postu Administrativu Suai, Juvanio Carvalho Moniz sente triste ho kondisaun estrada hodi difikulta transporte motorizada la asesu ba merkadu no sentru saúde.
“Ami sente triste tebes tanba ate agora ami seidauk asesu estrada ho di’ak, wainhira ami atu lori ami-nia produtu lokál hanesan kamí, Maek no seluk tan, durante ne’e ami hato’o bebeik ba ita-nia autoridade lokál no munisipiu sira, maibé ate agora seidauk responde. Ne’ebé ami husu nai ulun sira, se bele rona netik ami-nia halerik liliu kona-ba estrda, tanba husi okupasaun Indonésia ate agora ami komunidade aldeia tolu hanesan aldeia Tudulpo, Gala no Teda seidauk asesu estrada,” dehan Juvánio ba www.tempotimor.com, Ohin (17/5).
Iha sorin seluk xefe suku Beco mós rekoñese nia komunidade aldeia Tolu mak seidauk asesu estrada no eletrisidade durante husi okupasaun Indonézia to’o agora.
“Ha’u-nia komunidade aldeia Tudulpu, Gala no Teda mak durante ne’e seidauk sente ba rai ida ne’e nia ukun aan, tanba liu ona tinan 20, governu ida ko’alia kona-ba aldeia tolu nia problema, ha’u mós hato’o bebeik ona, maibé parte relevante seidauk responde. Iha semana kotuk ne’e mak husi tékniku PDIM munisípiu mós ba haree ona no Intituisaun ba Jestaun no Ekipamentu (IJE) mós ba survey, maibé bainhira mak atu dudu seidauk hatene loos,” dehan xefe suku ne’e.
Entertantu, total populasaun aldeia Tobur Teda, Gala no Tudulpo ne’ebé hola parte ba suku Beco, postu administrativu Suai munisípiu Covalima hamutuk liu 500 mak seidauk asesu ho di’ak ba estrda no elektrisidade.(*)
