Tempotimor (Covalima)-Bazeia ba kazu Covid-19 ne’ebé aumenta iha munisípiu Covalima, mak administradór Covalima hasai ona sirkulár hodi hapara movimentu no suspende atividade, maibé movimentu ema no transporte la’o normál tanba nesesidade familia mak obriga.
Tuir negosiante Ines Mendes iha merkadu Munisípiu Covalima katak, negosiante sira tenke faan produtu lokál no sasan sira seluk, tanba atu sustenta ba familia.
“Governu suspende atividade iha merkadu ne’e di’ak, maibé tenke hatene mós atu responde ami komunidade nia preokupasaun, se ami la mai faan, entaun hodi saída mak atu fó han, hemu ba ami-nia oan sira, ne’ebé ami kontinua faan ami-nia sasan, maibé ami nafatin kumpri regra governu nian hanesan uza máskra no fase liman bei-beik,” dehan negosiante Ines ba www.tempotimor.com iha Kuarta (19/5).
Iha sorin seluk reprezentante motorista merkadu Suai Ermandus do Carmo mós dehan, nu’udar motorista kada loron kontinua hal’o atividade, tanba nesesidade uma laran mak obriga.
“Ami motorista sira kontinua ojek, tanba hodi ida ne’e mak ami han, hemu lor-loron. Ne’ebé ami para ojek, se mak atu fó han no hemu ba ami, ema laiha aat liu mak governu uluk promete haruka ami trata ami-nia dokumentu atu simu osan, maibé ate agora la hetan buat ida,” katak nia.
Entretantu liuhusi rezolusaun númeru 48/2021 de 17 de maiu, mak Administradór munisípiu Covalima Fransisco de Andrade realiza sorumutu ida ho komandante PNTL munisípiu Covalima António Maria de Sá, Koordenadór Sala Situasaun, Sentru Integradu Jestaun Krize (SS-SIJK) munisípiu no diretór sira hotu iha Covalima atu suspende atividade merkadu no movimentu transporte públiku nian, maibé atividade sira ne’e kontinua la’o hanesan bai-bain.(*)
