Tempotimor (Covalima)-Tuir xefe suku Belekasak, Leonito Gusmão katak, durante Timor-Leste hetan nia liberdade, komunidade iha aldeia Gazolo, Ila, Busada’o, Du’ut iha suku Belekasak, postu Maucatar seidauk asesu ba eletrisidade.
“Uluk kedas ha’u-nia aldeia haat seidauk asesu eletrisidade, iha Avo Xanana nia tempu planu ona no besi rin harii ona, maibé momentu ne’ebá governu falladu, tanba ne’e abandona to’o agora,” dehan Leonito ba www.tempotimor.com iha Belekasak, Ohin (06/10).
Nia afirma, durante ne’e nia parte halo ona proposta ba ministériu relevantes, maibé to’o agora laiha resposta ruma husi governu.
“Durante ne’e ita halo ona proposta ba ministériu relevante, maibé ho situasaun hanesan ne’e to’o agora seidauk iha informasaun ida mai ami, ne’ebé agora dadaun ha’a-nia komunidade afeta hela ba eletrisidade,” Nia tenik.
Iha sorin seluk komunidade Bonifácio do Carmo husi aldeia Ila sente triste tanba moris iha nakukun, durante tinan barak ona no difikulta oan sira atu estuda iha tempu kalan, obrigadu tenke sunu kami timur hodi asesu ba naroman.
“Ha’u sente triste tanba laiha eletrisidade, dalaruma ami-nia oan sira atu estuda ami tenke sunu de’it kami timor, ne’ebe karik bele governu tau matan netik ba ami, tanba timor ukun aan to’o agora ami seidauk sente ba rai ida ne’e,” Bonifacio informa.
Enkuantu komunidade aldeia haat ne’e barak mak utiliza solar panel (tenagah surya), maibé balun avaria ona tanba utiliza durante tinan barak.(*)
